Ես ուզում եմ՝ իշխանության գա ուժ, որը, կհետաքննի պատերազմը, և մարդիկ կիմանան՝ ինչ է կատարվել․ Իզաբելլա Աբգարյան. ՏԵՍԱՆՅՈՒԹ

Երևանի ավագանու «Ազգային առաջընթաց» խմբակցության անդամ Իզաբելլա Աբգարյանը չի մասնակցելու առաջիկա խորհրդարանական ընտրություններին, քանի որ նախընտրում է կատարել իր պարտականությունները որպես Երևանի ավագանու անդամ մինչև իր մանդատի ավարտը։ Factor TV-ի հետ զրույցում նա նշեց, որ թեև պատգամավորի մանդատն ավելի գրավիչ է և ավելի մեծ հնարավորություններ է տալիս, այդ թվում՝ Երևանի խնդիրները լուծելու համար, այնուամենայնիվ, որոշել է չառաջադրվել։

Անդրադառնալով ներկայիս քաղաքական մթնոլորտին, որը հաճախ նմանվում է շոուի, Աբգարյանը նշեց, որ սա միայն հայաստանյան միտում չէ։ Նրա խոսքով՝ ստեղծվել է մի իրավիճակ, որտեղ բովանդակային քննարկումները հետին պլան են մղվել։ «Ցավոք սրտի, մենք ապրում ենք մի դարաշրջանում, որտեղ լայքերը և դիտումները դարձել են ավելի կարևոր, քան բովանդակությունը և իրական մարդկանց խնդիրները»,- ասաց նա։

Աբգարյանը քննադատեց քաղաքական դաշտի անձնավորված լինելը, որտեղ ամեն ինչ կենտրոնացած է անձերի, այլ ոչ թե գաղափարախոսությունների շուրջ։ «Մեզ մոտ ամեն ինչ անձնավորված է։ Մեզ մոտ կուսակցություններն էլ անձերի շուրջ են ձևավորվում, և այդ անձի համար պատրաստ են մարդիկ ֆանատ դառնալ։ Սխալ է դա։ Ես ինքս դեմ եմ անձապաշտությանը, դա շատ վատ է պետության համար»։

Ըստ Աբգարյանի՝ Հայաստանում առկա է «սարսափելի պառակտում»։ Նրա կարծիքով ներկայիս իշխանությունը չի հանդուրժում այլակարծություն՝ որպես օրինակ բերելով Հայկ Մարությանին և Գրիգոր Երիցյանին ավագանու մանդատից ապօրինի զրկելու դեպքը։ «Ցավոք, ցանկացած տիպի այլակարծություն չի հանդուրժվում։ Երբ ասում են՝ ժողովրդավարություն, ես ասում եմ՝ դուք ծաղրո՞ւմ եք»։

Իզաբելլա Աբգարյանի համոզմամբ՝ քաղաքական ուժերի համար այսօր գլխավոր օրակարգը պետք է լինի ոչ թե այլ խոստումները, այլ 44-օրյա պատերազմի պատճառների և հետևանքների անկողմնակալ հետաքննությունը։

«Ինձ համար 2020 թվականից կա մի նպատակ. ես ուզում եմ, որ իշխանության գա ուժ, որը, ի վերջո, կհետաքննի պատերազմը, և մարդիկ կիմանան՝ ինչ է եղել։ Այս իշխանությունը կատարեց հետաքննություն, բայց մենք գիտենք, որ դա չի հանրայնացվել։ Չի կարող պատերազմը վարած ուժը կատարել անկողմնակալ հետաքննություն իր իսկ ընդունած որոշումների վերաբերյալ»։

Աբգարյանը անվստահությամբ է խոսում  նաև նախկին իշխանությունների  մասին՝ նշելով, որ այսօրվա ընդդիմությունը նույնպես ունի իր «ճշմարտությունը» և չի կարող լինել օբյեկտիվ։

Խոսելով Հայկ Մարությանի գլխավորած «Նոր ուժ» կուսակցության և նրա վարած քարոզարշավի մասին, Աբգարյանը նշեց, որ Մարությանի հումորային ոճը թույլ է տալիս լսելի դառնալ՝ առանց ավելացնելու ընդհանուր ագրեսիան։ Սակայն նա իրատեսական չի համարում, որ Մարությանը կարող է դառնալ վարչապետ։  

Ըստ նրա՝ Հայաստանի համար լավագույն տարբերակը կլինի կոալիցիոն կառավարությունը, որտեղ կգործեն ներքին հակակշռող մեխանիզմներ։  

Աբգարյանը նաև քննադատեց հեղափոխական թևի մյուս ուժերին, որոնք, համախմբվելու փոխարեն, ըստ նրա, պառակտեցին դաշտը և անհիմն մեղադրանքներով հանդես եկան իրենց թիմի դեմ։  

Հարցազրույցն ամբողջությամբ՝ տեսանյութում։

Ռոբերտ Անանյան