Զելենսկին արդեն այսօր պետք է Դոնբասից զորքերի դուրսբերման վերաբերյալ որոշում կայացնի. Պեսկովը՝ Մոսկվայի պահանջի մասին

Ուկրաինայի նախագահ Վլադիմիր Զելենսկին արդեն այսօր պետք է որոշում կայացնի Դոնբասից ուկրաինական զորքերի դուրսբերման վերաբերյալ, հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։

«Ինչ վերաբերում է երկու ամսվան, ապա խոսքը երկու ամսվա մասին չէ։ Զելենսկին արդեն այսօր պետք է որոշում կայացնի, որ ուկրաինական զորքերը լքեն Դոնբասը և դուրս գան Դոնեցկի Ժողովրդական Հանրապետության վարչական սահմաններից»,- ասել է նա՝ մեկնաբանելով Զելենսկիի հայտարարությունը, որ Ուկրաինան պետք է երկու ամսվա ընթացքում դուրս բերի իր զորքերը Դոնբասից։

Պեսկովն ընդծել է՝ Զելենսկիի նման որոշումը կարող է փրկել բազմաթիվ մարդկանց կյանքեր և, ամենակարևորը, «թույլ տալ ավարտել այս պատերազմի թեժ փուլը»։

Պատասխանելով Ռուսաստանի, Ուկրաինայի և Միացյալ Նահանգների միջև իրավիճակի կարգավորման համար եռակողմ բանակցությունների դադարի վերաբերյալ հարցին՝ Պեսկովը նշել  է, որ դա պայմանավորված է Մերձավոր Արևելքում տեղի ունեցող իրադարձություններով։

«Դադարը պայմանավորված է նրանով, որ ամերիկացի բանակցողները ներկայում զբաղված են այլ գործերով, մտահոգված են Մերձավոր Արևելքի իրավիճակին վերաբերող հարցերով, և ակնհայտ պատճառներով նրանք այժմ չեն կարող ակտիվորեն մասնակցել ուկրաինական հարցերի շուրջ եռակողմ բանակցությունների գործընթացին»,- ասել է նա։

Զելենսկին հայտարարել էր, որ Ռուսաստանը բանակցությունների շրջանակում պահանջում է, որ Ուկրաինան երկու ամսվա ընթացքում դուրս բերի իր զորքերը Դոնեցկի մարզից՝ սպառնալով, որ հակառակ դեպքում պահանջները կփոխվեն։

Թարգմանությունը՝ Էմմա Չոբանյանի