Թրամփը հայտարարել է, որ «Իրանի կործանումից» հետո Ամերիկայի գլխավոր թշնամին Դեմոկրատական կուսակցությունն է

ԱՄՆ նախագահ Դոնալդ Թրամփը հայտարարել է, որ ԱՄՆ-ի գլխավոր թշնամին Դեմոկրատական կուսակցությունն է։ Այդ մասին նա գրել է իր Truth Social սոցիալական ցանցի էջում։ Միևնույն ժամանակ Թրամփը խոսել է «Իրանի կործանման» մասին, որը, դատելով նրա գրառումից, նախկինում համարվում էր թիվ մեկ թշնամին։

«Այժմ, Իրանի կործանումից հետո, Ամերիկայի գլխավոր թշնամին դարձել է ծայրահեղ ձախ, չափազանց անգործունակ Դեմոկրատական կուսակցությունը»,-գրել է Թրամփը։

Չնայած Թրամփի հայտարարությանը, ռազմական գործողությունները Իրանի, ԱՄՆ-ի և Իսրայելի միջև շարունակվում են։ Նախօրեին Իրանը հրթիռային հարված է հասցրել իսրայելական Դիմոնա քաղաքին՝ տուժել է 51 մարդ, այդ թվում՝ մեկ երեխա ծանր վիճակում է։ Իսրայելի բանակը հայտնել է, որ հրթիռներից մեկը չի որսացվել հակաօդային պաշտպանության համակարգի կողմից, և խափանման պատճառները պարզվում են։

Միաժամանակ ԱՄՆ-ը շարունակում է ռազմական ճնշումը Թեհրանի վրա։ Նախօրեին Թրամփը Իրանից պահանջել էր 48 ժամվա ընթացքում ապաշրջափակել Հորմուզի նեղուցը՝ հակառակ դեպքում սպառնալով հարվածներ հասցնել Իրանի էներգետիկ ենթակառուցվածքներին, այդ թվում՝ էլեկտրակայաններին։

Փետրվարի վերջում սկսված ռազմական արշավը շարունակվում է արդեն ավելի քան երեք շաբաթ։ Թեև ամերիկա-իսրայելական կոալիցիան հայտարարում է Իրանի զինված ուժերին հասցված լուրջ վնասների մասին, ներառյալ ՀՕՊ համակարգերի, նավատորմի և հրամանատարական կազմի զգալի մասի ոչնչացումը, Իրանը շարունակում է պահպանել պատասխան հարվածներ հասցնելու կարողությունը՝ ինչպես Իսրայելին, այնպես էլ տարածաշրջանում ԱՄՆ-ի օբյեկտներին։ Փորձագետները չեն բացառում նաև հակամարտության անցումը ցամաքային գործողությունների։