Պարսից ծոցում երկու լցանավերի վրա իրանական հարձակման հետևանքով առնվազն մեկ մարդ է զոհվել. ՏԵՍԱՆՅՈՒԹ

Պարսից ծոցում՝ Իրաքի Բասրա նավահանգստի մոտ, երկու նավթային լցանավերի վրա պայթյուններ են տեղի ունեցել։ Իրաքի նավահանգստային ընկերության գործադիր տնօրենը CNN-ին հայտնել է, որ երկու օտարերկրյա նավթատար նավերի անձնակազմի 38 անդամ փրկվել է, առնվազն մեկ մարդ զոհվել է, գրում է BBC-ի ռուսական ծառայությունը։

Իրանը ստանձնել է հարձակման պատասխանատվությունը՝ պնդելով, որ ստորջրյա անօդաչու թռչող սարքը «երեկոյան պայթեցրել է Պարսից ծոցում երկու նավթատար նավ», հայտնում է Իրանի պետական ​​IRIB հեռարձակողը։

Ավելի վաղ Բասրայում գտնվող իրաքյան անվտանգության աղբյուրը CNN-ին հայտնել էր, որ պայթուցիկներով լի իրանական սուզանավը, ենթադրաբար, հարձակվել է երկու նավերի վրա։ Իրաքի նավթային նավահանգիստները դադարեցրել են գործունեությունը հարձակումից հետո։ Հարձակումը տեղի է ունեցել երկրի տարածքային ջրերում, ասել է Իրաքի համատեղ գործողությունների հրամանատարության խոսնակ Սաադ Մաանը՝ հարձակումն անվանելով ինքնիշխանության խախտում։

Նավերի հետևման տվյալները ցույց են տալիս, որ հարձակման ենթարկված նավերը խարիսխ են գցել միմյանց հարևանությամբ, երբ հրդեհը բռնկվել է։ Դրանք Մալթայի դրոշի ներքո նավարկող Zefyros ու Մարշալյան կղզիների դրոշի ներքո նավարկող Safesea Vishnu լցանավերն են։ Safesea Vishnu-ն գրանցված է ամերիկյան Safesea Transport Inc. ընկերության անունով, մինչդեռ Zefyros-ը պատկանում է հունական ընկերության։

Իրաքի նավթային մարքեթինգի SOMO ընկերությունը հայտարարել է, որ նավերը հարձակման են ենթարկվել «իրաքյան տարածքային ջրերի կողային բեռնման գոտում»։ Zefyros-ը պատրաստվում էր մտնել Խոր ալ-Զուբեյր նավահանգիստ և կոնդենսատ էր տեղափոխում Բասրա՝ գազային ընկերության համար։

Բացի այդ, հաղորդվում է, որ Արաբական Միացյալ Էմիրությունների Ջեբել Ալի նավահանգստից 35 ծովային մղոն հյուսիս գտնվող կոնտեյներային նավին անհայտ արկ է հարվածել՝ առաջացնելով փոքր հրդեհ, հայտնել է Մեծ Բրիտանիայի Ծովային առևտրի գործառնությունների գրասենյակը (UKMTO):