«Ամեն ինչ հանգիստ է, հույս ունենք՝ կթռչենք»․ ՀՀ քաղաքացիները սպասում են Մասկատ-Երևան չվերթին

Հայաստանի քաղաքացի Արտակ Մխիթարյանն այն խմբի հետ է, որի համար ԱՄԷ-ում ՀՀ դեսպանությունը կազմակերպել էր անվճար տեղափոխություն Դուբայից  հարևան Օման։ Այս պահին քաղաքացիները Մասկատի օդանավակայանում են և սպասում են դեպի Հայաստան չարտերային չվերթին։

«Մասկատի օդանավակայանում ենք, ամեն ինչ հանգիստ է, չարտերային թռիչքը նախատեսված է 22։30-ին, հույս ունենք, որ կթռչենք»,- Factor TV-ի հետ զրույցում ասաց նա։

Արտակը պատմեց, որ ընկերների հետ ԱՄԷ էր մեկնել փետրվարի 23-ին՝ նախատեսելով վերադառնալ փետրվարի 28-ին, սակայն ստեղծված իրավիճակի բերումով ստիպված մնացել են Դուբայում։

Նրա խոսքով՝ դիվանագիտական ներկայացուցչությունների աշխատակիցներն առաջին իսկ պահից իրենց կողքին են եղել թե՛ Դուբայում, թե՛ Մասկատի օդանավակայանում։

Անդրադառնալով վերադարձի ֆինանսական բարդություններին՝ Արտակ Մխիթարյանը հայտնեց, որ միայն մեկ տոմսի համար ստիպված է եղել 900 դոլարից ավելի վճարել։

«Տոմսերի արժեքի մասին խոսք չկա, շատ թանկ է։ Կարծում եմ՝ որոշ մարդիկ օգտվեցին այս պահից և կարողացան լավ գումարներ աշխատել, բայց ինչ արած՝ ֆորսմաժորային վիճակ է»,- նշեց նա՝ միաժամանակ կարծիք հայտնելով, որ նման ֆորսմաժորային իրավիճակներում պետությունը պարտավոր է կանգնել իր քաղաքացիների կողքին։

Հիշեցնենք, որ փետրվարի 28-ին Իրանի, Իսրայելի և ԱՄՆ-ի միջև սկսված ռազմական գործողություններով պայմանավորված՝ Մերձավոր Արևելքի օդային տարածքը շարունակում է ամբողջությամբ կամ մասնակիորեն փակ մնալ: Ավիաընկերությունների կողմից չեղարկվել են հազարավոր կանոնավոր չվերթներ, այդ թվում՝ Դուբայից դեպի Երևան:

Ստեղծված իրավիճակում ԱՄԷ-ում ՀՀ դեսպանությունը կազմակերպել էր քաղաքացիների հատուկ և անվճար տեղափոխում ավտոբուսներով՝ ԱՄԷ-ից դեպի Օման (Մասկատ), որպեսզի այնտեղից հնարավոր լինի «Fly One» ընկերության միջոցով իրականացնել տարհանման չվերթներ դեպի Հայաստան։

Անի Թամրազյան