Իսրայելում թուրք լրագրողներ են ձերբակալվել հրթիռային հարվածները լուսաբանելիս. ՏԵՍԱՆՅՈՒԹ

Իսրայելի անվտանգության ուժերը ձերբակալել են CNN TURK-ի լրագրողական խմբին Թել Ավիվից ուղիղ եթերի ժամանակ, երբ խումբը լուսաբանում էր Իրանի կողմից հրթիռային հարվածից հետո քաղաքում ստեղծված լարվածությունը։

Լրագրող Էմրահ Չաքմակը և օպերատոր Հալիլ Քահրամանը ձերբակալվել են Իսրայելի Պաշտպանության նախարարության մոտից՝ Թել Ավիվի կենտրոնում գտնվող կարևորագույն կառավարական շենքից ռեպորտաժ վարելիս։ Ուղիղ կապը կտրուկ անջատվել է, երբ անվտանգության աշխատակիցները մոտեցել են խմբին և դադարեցրել հեռարձակումը։

Միջադեպը տեղի է ունեցել Իրանի կողմից Թել Ավիվի ուղղությամբ հրթիռային հարձակումից կարճ ժամանակ անց, ինչը սրել է տարածաշրջանային լարվածությունը: Իրավիճակի զարգացմանը զուգընթաց՝ CNN TURK-ի թիմն ուղիղ եթերում է եղել ՊՆ-ի մոտ գտնվող տարածքից՝ տեղում զարգացումների մասին հաղորդելու համար:

Մինչ թղթակիցը խոսել է Իսրայելում լրատվամիջոցների գործունեության սահմանափակումների, մասնավորապես, այն մարտահրավերների մասին, որոնց երբեմն բախվում են օտարերկրյա մամուլի ներկայացուցիչները՝ զգայուն վայրերից ռեպորտաժներ անելիս, կապն ընդհատվել է։

Լրագրողների ձերբակալության տևողության կամ հետագա ընթացակարգերի մասին լրացուցիչ մանրամասներ չեն տրամադրվել։

Թուրքիայի նախագահականի հաղորդակցության տնօրեն Բուրհանեթթին Դուրանը հայտարարել է, որ Անկարան դիվանագիտական ​​ջանքեր է գործադրել Իսրայելում CNN TURK-ի լրագրողի և օպերատորի ձերբակալությունից հետո՝ դա անվանելով «մամուլի վրա ևս մեկ հարձակում»։

Թարգմանությունը՝ Էմմա Չոբանյանի