30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Զելենսկին օգնություն է առաջարկել իրանական ԱԹՍ-ների դեմ պայքարում՝ ՌԴ-ի հետ մեկամսյա հրադադարի դիմաց. Bloomberg
Քաղաքականություն
03.03.2026 | 16:36
Ուկրաինայի նախագահ Վլադիմիր Զելենսկին առաջարկել է Մերձավոր Արևելք ուղարկել իրանական անօդաչու թռչող սարքերի որսման իր լավագույն մասնագետներին, եթե տարածաշրջանի առաջնորդները համոզեն ՌԴ նախագահ Վլադիմիր Պուտինին՝ համաձայնվել մեկամսյա հրադադարի Ուկրաինայի պատերազմում։ Այս մասին նա հայտարարել է Bloomberg-ի հետ հեռախոսազրույցում։
Ըստ Ուկրաինայի նախագահի՝ չորս տարվա լայնածավալ ներխուժումը թույլ է տվել Կիևին ձեռք բերել անօդաչու թռչող սարքերի, այդ թվում՝ իրանական «Շահեդ»-ների դեմ պայքարի եզակի փորձ, որոնք ներկայում կիրառվում են ԱՄԷ-ի, Կատարի և Սաուդյան Արաբիայի դեմ, գրում է The Insider-ին:
«Ես կառաջարկեի հետևյալը. Մերձավոր Արևելքի առաջնորդները լավ հարաբերություններ ունեն ռուսների հետ։ Նրանք կարող են խնդրել ռուսներին մեկամսյա հրադադար հաստատել։ Հրադադարի հաստատումից հետո մենք անօդաչու թռչող սարքերի որսման մեր լավագույն օպերատորներին կուղարկենք Մերձավոր Արևելքի երկրներ»,- ասել է Զելենսկին։
Մերձավորարևելյան երկրների քաղաքները ենթարկվում են իրանական անօդաչու թռչող սարքերի և հրթիռների հարվածներին՝ ի պատասխան ԱՄՆ-ի և Իսրայելի կողմից Իրանի գերագույն առաջնորդ այաթոլլահ Ալի Խամենեիի և այլ բարձրաստիճան պաշտոնյաների սպանության։
Մարտի 2-ին Ռուսաստանի նախագահ Վլադիմիր Պուտինը մի շարք հեռախոսազրույցներ է ունեցել Պարսից ծոցի տուժած երկրների ղեկավարների հետ: Կրեմլի խոսնակ Դմիտրի Պեսկովը հայտարարել է, որ Մոսկվան նաև «մշտական կապի մեջ է Իրանի ղեկավարության հետ»:
Ռուսաստանը նախկինում անտեսել է ԱՄՆ նախագահ Դոնալդ Թրամփի կոչերը Ուկրաինայում հրադադարի վերաբերյալ, չնայած Վաշինգտոնի ջանքերին՝ խաղաղության համաձայնագրի կնքման հասնելու համար, և պարզ չէ, թե ինչու է Պուտինը համաձայնվելու դրան հիմա, ընդգծում է Bloomberg-ը:
Թարգմանությունը՝ Էմմա Չոբանյանի
