27.10.2026 | 23:30
Հայաստանի, Ադրբեջանի և Վրաստանի դեսպանները քննարկել են Հարավային Կովկասի խաղաղության և կայունության ամրապնդման հարցերը
Զելենսկին հայտնել է, որ Ուկրաինայի, ԱՄՆ-ի ու ՌԴ-ի հաջորդ հանդիպումը կարող է կայանալ մարտի սկզբին Աբու Դաբիում
Քաղաքականություն
27.02.2026 | 13:58
ԱՄՆ-ի, Ռուսաստանի և Ուկրաինայի ներկայացուցիչների հանդիպումը կարող է տեղի ունենալ մարտի սկզբին ԱՄԷ մայրաքաղաք Աբու Դաբիում։ Այս մասին հայտարարել է Ուկրաինայի նախագահ Վլադիմիր Զելենսկին իր երեկոյան ելույթում՝ Ժնևում ամերիկյան և ուկրաինական պատվիրակությունների միջև խորհրդակցություններից հետո, գրում է BBC-ի ռուսական ծառայությունը։
«Ես այսօր արդեն մի քանի անգամ խոսել եմ Ռուստեմ Ումերովի, Դավիդ Արախամիայի և ԱՄՆ նախագահի դեսպաններ Սթիվ Ուիթկոֆի և Ջարեդ Քուշների հետ՝ նրանց այսօրվա հանդիպումներից հետո։ Հաջորդ եռակողմ ձևաչափի համար արդեն իսկ ավելի մեծ պատրաստակամություն կա։ Ամենայն հավանականությամբ, հաջորդ հանդիպումը կկայանա Արաբական Միացյալ Էմիրություններում, մասնավորապես՝ Աբու Դաբիում», – ասել է Զելենսկին։
Ուկրաինայի ղեկավարի խոսքով՝ անհրաժեշտ է «ամփոփել իրական անվտանգության երաշխիքների առումով ձեռք բերված ամեն ինչ և նախապատրաստել ղեկավարների մակարդակով հանդիպում»։
«Պատերազմը պետք է ավարտել, սա մեր դիրքորոշումն է, սա Ուկրաինայի դիրքորոշումն է, սա մեր բոլոր գործընկերների դիրքորոշումն է։ Սակայն, ցավոք, բոլորը հիմա տեսնում են, որ Ռուսաստանը պատրաստ չէ խաղաղության, և դեռևս չկան նշաններ, որ Պուտինը կանգնեցնում է իր ռազմական մեքենան։ Ընդհակառակը, նա պատրաստվում է շարունակել կռվելը, և աշխարհը պետք է պատրաստ լինի ճնշում գործադրել Ռուսաստանի վրա՝ դա փոխելու համար», – հավելել է Զելենսկին։
Ավելի վաղ հաղորդվել էր, որ ԱՄՆ նախագահ Դոնալդ Թրամփը Վլադիմիր Զելենսկիի հետ զրույցում հայտարարել է, որ ցանկանում է որքան հնարավոր է շուտ` մեկ անսվա ընթացքում, դադարեցնել պատերազմը Ուկրաինայում։
Թարգմանությունը` Էմմա Չոբանյանի
