Կուբացի սահմանապահները կրակել են ԱՄՆ մոտորանավակի վրա, կան զոհեր

Կուբայի սահմանապահները կրակ են բացել ԱՄՆ-ից Կուբայի տարածքային ջրեր մտած մոտորանավակի վրա, գրում է DW-ի ռուսական ծառայությունը: CNN-ը հաղորդում է, որ չորեքշաբթի տեղի ունեցած միջադեպի հետևանքով զոհվել է նավի վրա գտնվող չորս մարդ, վիրավորվել՝ վեցը: Վիրավորվել է նաև մեկ սահմանապահ:

Կուբայի Ներքին գործերի նախարարության տվյալներով՝ Ֆլորիդայում գրանցված նավը մտել է Կուբայի տարածքային ջրեր՝ Կուբայի Վիլլա Կլարա նահանգի Ֆալկոնես Քեյ կղզու մոտ։ Ըստ հաղորդագրության՝ նավակի ուղևորները կրակ են բացել կուբացիների վրա՝ վիրավորելով նավապետին, որից հետո սահմանապահները դիմել են ուժի: Վիրավորներին հետագայում բժշկական օգնություն է ցուցաբերվել: Հավանայի պաշտոնյաները հայտարարել են, որ նավի անձնակազմը «ահաբեկչական մտադրություններ» է ունեցել:

«Նավի վրա տասը զինված անձինք կային, որոնք ցանկանում էին անօրինական կերպով մուտք գործել Կուբա», – ասվում է երկրի  ՆԳՆ հայտարարության մեջ:

ԱՄՆ փոխնախագահ Ջեյ Դի  Վենսը հայտարարել է, որ Սպիտակ տունը հետևում է իրավիճակին։ Նա ասել է, որ ԱՄՆ պետքարտուղար Մարկո Ռուբիոն իրեն տեղեկացրել է միջադեպի մասին, բայց մանրամասներ չի ներկայացրել։

Ֆլորիդայի նահանգապետ Ջեյմս Ութմայերը հայտարարել է, որ հանձնարարել է նահանգի իրավապահ մարմիններին օգնել դաշնային իշխանություններին հետաքննություն սկսելու հարցում։

Մարկո Ռուբիոն, իր հերթին, հայտարարել է, որ Վաշինգտոնը կանցկացնի միջադեպի սեփական հետաքննությունը և կանի համապատասխան եզրակացություններ: Նա ընդգծել, որ ամերիկյան նավի ներկայությունը Կուբայի ջրերում կապված չէ ԱՄՆ որևէ գործողության հետ, և որ նավի վրա որևէ պետական ​​​​պաշտոնյա չի եղել:

Միջադեպը տեղի է ունեցել Կուբայի վրա ԱՄՆ-ի շարունակական ճնշումների ֆոնին: Վենեսուելայում ռազմական գործողությունից և Նիկոլաս Մադուրոյի գերեվարումից հետո ԱՄՆ նախագահ Դոնալդ Թրամփը մեղադրել է Կուբայի կառավարությանը ԱՄՆ ազգային անվտանգությանը սպառնալու մեջ և մաքսատուրքեր սահմանել Հավանա նավթ կամ նավթամթերք մատակարարող բոլոր երկրների նկատմամբ։

Նավթի պակասը խիստ բացասական ազդեցություն է ունեցել կղզու տնտեսության վրա, այդ թվում՝ զբոսաշրջության ոլորտի: Ավիավառելիքի պակասի պատճառով արտասահմանյան ավիաընկերությունները փետրվարի սկզբին սկսեցին չեղարկել դեպի Կուբա չվերթները: Փետրվարի կեսերին Իսպանիան հայտարարել է, որ կղզի կուղարկի սնունդ և դեղորայք,  Մեքսիկան ևս  մարդասիրական օգնություն է տրամադրել:  Հավանան հայտարարել է Միացյալ Նահանգների հետ առանց նախապայմանների բանակցելու իր պատրաստակամության մասին:

Թարգմանությունը՝ Էմմա Չոբանյանի