25.04.2026 | 15:40
Մեզ պետք է հասկանալ՝ ինչքան երջանիկ ենք, որ ունենք Հայաստանի Հանրապետությունը․ Փաշինյան․ ՏԵՍԱՆՅՈւԹ
ԵՄ-ն Ուկրաինային 90 մլրդ եվրո վարկ կտրամադրի՝ չնայած Հունգարիայի վետոյին
Քաղաքականություն
24.02.2026 | 23:18
ԵՄ-ն Ուկրաինային 90 մլրդ եվրո վարկ կտրամադրի՝ չնայած Հունգարիայի վետոյին։ Այս մասին հայտարարել է Եվրահանձնաժողովի ղեկավար Ուրսուլա ֆոն դեր Լայենը Ուկրաինայի նախագահ Վլադիմիր Զելենսկու և Եվրախորհրդի ղեկավար Անտոնիո Կոշտայի հետ համատեղ ճեպազրույցում։
«Վարկը համաձայնեցվել է Եվրոպական խորհրդում 27 պետությունների և կառավարությունների ղեկավարների կողմից։ Նրանք խոսք են տվել, և այդ խոսքը չի կարող դրժվել», – DW-ի փոխանցմամբ՝ հայտարարել է նա։
Ֆոն դեր Լայենը չի հստակեցրել, թե ինչպես ԵՄ-ն կկարողանա վարկ տրամադրել՝ ասելով, որ «կան զանազան տարբերակներ»:
Եվրախորհրդարանի ղեկավար Ռոբերտա Մեցոլան նույն օրը հայտնել է, որ ստորագրել է Կիևին այդ վարկը հատկացնելու մասին փաստաթուղթը: Նրա խոսքով՝ այդ գումարները կուղղվեն Ուկրաինայի պետական ծառայությունների աշխատանքին և երկրի պաշտպանությանը, դրանք կոչված են «պաշտպանել ընդհանուր անվտանգությունն ու ազատությունը եւ ամրապնդել Ուկրաինայի ապագան Եվրոպայում»:
Հունգարիան փետրվարի 20-ին արգելափակել Է Ուկրաինային վարկի հատկացումը և հայտարարել, որ չի փոխի իր դիրքորոշումը մինչև «Դրուժբա» խողովակաշարով Հունգարիա նավթի տարանցման վերսկսումը: Ուկրաինայի տվյալներով՝ ռուսական նավթը Սլովակիա և Հունգարիա հասցնելու համար իր տարածքով անցնող նավթամուղը վնասվել է հունվարի 27-ին ՌԴ-ի հարվածների հետևանքով, ինչի հետևանքով նավթի տարանցումը ժամանակավորապես դադարեցվել է:
