27.10.2026 | 23:30
Հայաստանի, Ադրբեջանի և Վրաստանի դեսպանները քննարկել են Հարավային Կովկասի խաղաղության և կայունության ամրապնդման հարցերը
ԱՄՆ-ը սկսել է Սիրիայից դուրս բերել իր վերջին զորքերը. WSJ
Քաղաքականություն
19.02.2026 | 16:35
Wall Street Journal-ը, հղում անելով անանուն ամերիկացի պաշտոնյաների, հաղորդում է, որ ԱՄՆ-ը երկու ամսվա ընթացքում դուրս կբերի իր բոլոր զինծառայողներին Սիրիայից։ Այժմ այնտեղ տեղակայված է շուրջ 1000 ամերիկացի զինվորական, փոխանցում է The Insider-ը։
Ավելի վաղ հայտնի էր դարձել, որ ԱՄՆ զորքերը դուրս են բերվել Սիրիայի հարավում գտնվող Ալ-Թանֆ բազայից, որը գտնվում է Իրաքի և Հորդանանի սահմանների մոտ։ Այն հանձնվել է սիրիական հրամանատարությանը:
2014 թվականից ի վեր բազան «Իսլամական պետության» դեմ կոալիցիայի գործողությունների կենտրոնն էր: ԱՄՆ կենտրոնական հրամանատարությունն անցյալ շաբաթ հայտարարել էր, որ զորքերի «կազմակերպված դուրսբերումը» «կանխամտածված և պայմանների վրա հիմնված անցումային շրջանի մի մասն էր»:
Բաշար ալ-Ասադի տապալումից և Սիրիայում «Հայաթ Թահրիր ալ-Շամ» խմբավորման ու դրա առաջնորդ Ահմեդ ալ-Շարաայի իշխանության գալուց հետո, Միացյալ Նահանգները դադարեցրեց քրդա-արաբական դաշինքին՝ «Սիրիայի դեմոկրատական ուժերին» աջակցելը՝ ստիպելով քրդերին դուրս գալ իրենց գրաված տարածքներից, իսկ բանտերը, որտեղ պահվում էին ԻԼԻՊ-ի նախկին մարտիկները, թողնելով անպաշտպան։
Միևնույն ժամանակ, ԱՄՆ-ը մեծացնում է իր ռազմածովային ներկայությունը Մերձավոր Արևելքում: Վաշինգտոնը տարածաշրջան է ուղարկել երկու նավատորմ՝ USS Abraham Lincoln և USS Gerald R. Ford ավիակիրների գլխավորությամբ: Reuters-ի աղբյուրների համաձայն՝ ԱՄՆ զինված ուժերը պատրաստվում են Իրանի դեմ շարունակական ռազմական գործողության, եթե նախագահ Դոնալդ Թրամփը հարձակման հրաման տա:
Թարգմանությունը՝ Էմմա Չոբանյանի
