11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Կոչ ենք անում ԱՄՆ-ին և Իրանին՝ բանակցությունների սեղանի շուրջ նստել. Թուրքիայի ԱԳ նախարար
Քաղաքականություն
30.01.2026 | 17:45
Իրանի և ԱՄՆ-ի միջև միջուկային բանակցությունների վերսկսումը կառուցողական հիմունքներով կենսական նշանակություն ունի տարածաշրջանային լարվածության նվազեցման համար: Այդ բանակցությունները նաև ճանապարհ կհարթեն Իրանի դեմ պատժամիջոցների վերացման և միջազգային տնտեսական համակարգին նրա ինտեգրման համար: Այս մասին հայտարարել է Թուրքիայի ԱԳ նախարար Հաքան Ֆիդանը Անկարայում Իրանի ԱԳ նախարար Աբբաս Արաղչիի հետ համատեղ մամուլի ասուլիսում։
«Մենք մեր բոլոր գործընկերներին ամեն հնարավորության դեպքում փոխանցել ենք, որ դեմ ենք Իրանում ռազմական միջամտությանը: Մեր նախագահը նաև այսօր առավոտյան հեռախոսով զրուցել է պարոն Փեզեշքիանի հետ (Իրանի նախագահ Մասուդ Փեզեշքիան): Մենք այստեղ կրկնում ենք, որ դեմ ենք խնդիրները լուծելու համար ռազմական լուծումների դիմելուն, չենք կարծում, որ դա շատ արդյունավետ կլինի: Մենք կողմնակից ենք բանակցությունների և դիվանագիտության»,- ասել է նա։
Նա հավելել է, որ տարածաշրջանի երկրները խաղաղություն, կայունություն և անդորր են ցանկանում։
«Իմ հարգարժան եղբորը՝ պարոն Արաղչիին կրկին ասացի, որ Թուրքիան պատրաստ է ամեն հնարավոր աջակցություն ցուցաբերել խնդիրների խաղաղ կարգավորման համար։ Մյուս կողմից՝ մենք նաև տեսնում ենք, որ Իսրայելը փորձում է համոզել ԱՄՆ-ին ռազմական հարձակում սկսել Իրանի դեմ։ Իսրայելի այս ջանքերը կարող են մեծապես վնասել մեր տարածաշրջանի փխրուն կայունությանը։ Մենք հույս ունենք, որ ԱՄՆ վարչակազմը կգործի առողջ բանականությամբ և թույլ չի տա, որ դա տեղի ունենա։ Իսրայելը պետք է դադարեցնի իր անկայունացնող քաղաքականությունը տարածաշրջանում»։
Թարգմանությունը՝ Էմմա Չոբանյանի
