Դանիայի վարչապետն այցելել է Գրենլանդիա՝ տեղաբնակներին իր աջակցությունը հայտնելու

Դանիայի վարչապետ Մետտե Ֆրեդերիկսենն այցելել է Գրենլանդիայի մայրաքաղաք Նուուկ՝ հանդիպելու գրենլանդացիների հետ։

Euronews-ը հաղորդւմ է, որ Նուուկ կատարած այցի ընթացքում Ֆրեդերիկսենը հանդիպել է Գրենլանդիայի վարչապետ Յենս-Ֆրեդերիկ Նիլսենի հետ, ապա հանդես եկել մամուլի ասուլիսով։

Դանիայի վարչապետը նշել է, որ Միացյալ Նահանգների հետ իրավիճակը շարունակում է մնալ դժվար, ապա ընդգծել է, որ եկել է ցույց տալու Դանիայի աջակցությունը Գրենլանդիային.

«Ես հասկանում եմ, թե որքան դժվար է սա Գրենլանդիայի ժողովրդի համար։ Այսօր ես խոսեցի շատ տարբեր մարդկանց հետ, և նրանք բոլորը նույն բանն ասացին։ Հուսով եմ, որ Գրենլանդիայի բոլոր բնակիչները կզգան Դանիայի անվերապահ, հսկայական ու սրտանց աջակցությունը»։

Նիլսենը, իր հերթին, հայտարարել է, որ Գրենլանդիան գործում է Դանիայի հետ համակարգված։

Հիշեցնենք, որ դեռևս հունվարի 17-ին ԱՄՆ նախագահ Դոնալդ Թրամփը հայտարարել էր, որ փետրվարի 1-ից Դանիայից, Նորվեգիայից, Շվեդիայից, Ֆրանսիայից, Գերմանիայից, Միացյալ Թագավորությունից, Նիդեռլանդներից և Ֆինլանդիայից ներմուծվող ապրանքների վրա կսահմանվի 10 տոկոս մաքսատուրք։

Հունվարի 21-ին Դավոսում կայացած հանդիպումների ժամանակ Թրամփը հայտարարել էր, որ ինքը և ՆԱՏՕ-ի գլխավոր քարտուղար Մարկ Ռյուտեն «շրջանակային համաձայնության» են եկել Գրենլանդիայի վերաբերյալ և, որպես արդյունք, կասեցրել են փետրվարի 1-ին նախատեսված ութ եվրոպական երկրների նկատմամբ մաքսատուրքերը։

Իր սոցիալական ցանցերի էջում Թրամփը Ռյուտեի հետ հանդիպման մասին մեկնաբանել է հետևյալը. «Այս հանդիպման արդյունքում մենք շրջանակ ենք ստեղծել Գրենլանդիայի և ամբողջ Արկտիկական տարածաշրջանի վերաբերյալ ապագա համաձայնագրի համար։ Եթե այս որոշումը կյանքի կոչվի, դա հիանալի լուծում կլինի Միացյալ Նահանգների և ՆԱՏՕ-ի բոլոր երկրների համար»։

Թարգմանությունը՝ Անահիտ Խաչատրյանի