Եթե համաձայնագիրը կնքվի՝ հիանալի լուծում կլինի ԱՄՆ-ի և ՆԱՏՕ-ի բոլոր երկրների համար․ Թրամփը հրաժարվել է եվրոպական երկրների նկատմամբ նոր մաքսատուրքերից

ԱՄՆ նախագահ Դոնալդ Թրամփը սոցիալական իր ցանցում գրառում է կատարել՝ նշելով, որ Միացյալ Նահանգները կհրաժարվի եվրոպական երկրների նկատմամբ նոր մաքսատուրքերից, որոնք գործելու էին մի քանի օրից՝  փետրվարի 1-ից։

«ՆԱՏՕ-ի գլխավոր քարտուղար Մարկ Ռուտտեի հետ ունեցած շատ արդյունավետ հանդիպման հիման վրա մենք ձևավորել ենք Գրենլանդիայի և, ըստ էության, ամբողջ Արկտիկական տարածաշրջանի վերաբերյալ ապագա համաձայնագրի շրջանակը։ Այս լուծումը, եթե այն կնքվի, հիանալի լուծում կլինի Ամերիկայի Միացյալ Նահանգների և ՆԱՏՕ-ի բոլոր երկրների համար։ Այս փոխըմբռնման հիման վրա ես չեմ կիրառի այն մաքսատուրքերը, որոնք նախատեսված էին ուժի մեջ մտնել փետրվարի 1-ից։ Լրացուցիչ քննարկումներ են ընթանում «Ոսկե գմբեթի» վերաբերյալ՝ Գրենլանդիային վերաբերող։

Լրացուցիչ տեղեկություններ կտրամադրվեն քննարկումների ընթացքին զուգընթաց։

Փոխնախագահ Ջ. Դ. Վենսը, պետքարտուղար Մարկո Ռուբիոն, հատուկ դեսպանորդ Սթիվ Վիտկոֆը և անհրաժեշտության դեպքում այլ անձինք պատասխանատու կլինեն բանակցությունների համար։ Նրանք անմիջապես հաշվետու լլինեն ինձ»,- գրել է ԱՄՆ առաջնորդը՝ շնորհակալություն հայտնելով ուշադրության համար։

Հիշեցնենք, որ Թրամփը Truth Social-ում հայտնել էր, որ 2026 թվականի փետրվարի 1-ից Դանիայից, Նորվեգիայից, Շվեդիայից, Ֆրանսիայից, Գերմանիայից, Միացյալ Թագավորությունից, Նիդերլանդներից և Ֆինլանդիայից Միացյալ Նահանգներ ուղարկվող բոլոր ապրանքների համար կգանձվի 10 տոկոսանոց մաքսատուրք։

Եվրամիությունն էլ ի պատասխան նախատեսել էր հակամաքսատուրքեր սահմանել ԱՄՆ-ի նկատմամբ կամ սահմանափակումներ սահմանել ամերիկյան ընկերությունների գործունեության վրա իր տարածքում, եթե Թրամփը 10% մաքսատուրքեր սահմանի եվրոպական ութ երկրների նկատմամբ՝ Գրենլանդիայի նկատմամբ նրանց դիրքորոշման պատճառով։

Թարգմանությունը՝ Անահիտ Խաչատրյանի