Անթույլատրելի է` քաղաքացիությունից հրաժարվում և չեն ծառայում. Սարգսյան․ ՏԵՍԱՆՅՈՒԹ

Այս պահին կան ավելի քան 1200 տղաներ, որոնք բնակվում են արտասահմանում, չեն ծառայել և հիմա հետախուզման մեջ են բանակում չծառայելու հանգամանքով։ Այս մասին խորհրդարանում լրագրողների հետ ճեպազրույցում ասաց իշխանական պատգամավոր Հայկ Սարգսյանը։

«Եթե նրանք այժմ վերադառնան կամ հայտնաբերվեն, նրանք պետք է դատապարտվեն ազատազրկման երկուսից հինգ տարի ժամկետով, որևէ այլ տարբերակ չունեն։ Եթե անգամ ցանկանան գան երկու տարի ժամկետով կամ, օրինակ, հինգ տարի ժամկետով ծառայեն ազատազրկվելու փոխարեն՝ միևնույնն է, չունեն նման հնարավորություն»,- ասաց Հայկ Սարգսյանը։

Ըստ պատգամավորի՝ իր նախաձեռնած փոփոխությամբ նրանց հնարավորություն է տրվում գալ հայրենիք, ծառայել երկու տարի ժամկետով և կարճել քրեական գործը։

«Այսինքն՝ պետությունը ստիպված չլինի նրանց վրա ծախսել 15 միլիոն դրամ անազատության մեջ պահելու համար, այլ իրենք գան ծառայեն և դրանով իրենց ներդրումը ունենան բանակի մեջ և նաև մեր պետության պահպանության գործում։ Եթե ինչ-ինչ հանգամանքներով մեր քաղաքացիները 27 տարեկանը լրանալուց հետո ունեն ընտանիք, ծանրաբեռնվածություն կամ առողջական խնդիրներ, որոնցով պայմանավորված չեն կարող ծառայել, նրանք կարող են վճարել որոշակի գումարներ և ծառայել կրճատված ժամկետով։ Օրինակ՝ վճարել 8 միլիոն՝ ծառայել մեկ ամիս, վճարել 5 միլիոն՝ ծառայել վեց ամիս, վճարել 2.5 միլիոն՝ ծառայել մեկ տարի, կամ չվճարել և ծառայել երկու տարի ժամկետով»,- բացատրեց Սարգսյանը։

Սարգսյանի խոսքով՝ այս օրենքի շնորհիվ առաջիկա մեկ տարվա ընթացքում մոտավորապես մինչև 5 միլիոն դոլարի պետական եկամուտ կլինի և հարյուրավոր քաղաքացիներ կվերադառնան Հայաստանի Հանրապետություն և կհաշվառվեն պահեստազորում։

Մանրամասները՝ տեսանյութում։