25.08.2026 | 11:25
Չեմ տեսել` հանրությունը պահանջի, որ Քոչարյանի որդիները չժառանգեն այս բնակարանը. Սուքոյան․ ՏԵՍԱՆՅՈՒԹ
Ռուսաստանը կենտրոնանում է Հայաստանի վրա․ 165 մլն դոլար կծախսվի արտերկրում փափուկ ուժի ընդլայնման վրա․ OC Media
Քաղաքականություն
15.01.2026 | 12:18
Ռուսաստանի նախագահի աշխատակազմը դրամաշնորհի միջոցով կֆինանսավորի իր փափուկ ուժի ընդլայնումը արտերկրում, մասնավորապես, կենտրոնանալով Հայաստանի վրա, ռուսական ՌԲԿ-ին ասել են աղբյուրները: Ըստ որոշ տեղեկությունների՝ նախագծի բյուջեն կկազմի շուրջ 13 միլիարդ ռուբլի (165 միլիոն դոլար)։ Աշխատանքները կղեկավարի Ռուսաստանի նախագահի աշխատակազմի ղեկավարի առաջին տեղակալ Սերգեյ Կիրիենկոն: Այս մասին ասվում է OC Media-ի անդրադարձում։
2025 թվականի մայիսին ռուսական «Վեդոմոստի»-ին հաղորդել էր, որ Կիրիենկոն «հանձնարարական կունենա»՝ 2026 թվականի խորհրդարանական ընտրություններից առաջ «փափուկ ուժի» միջոցով առաջ մղել ռուսական շահերը Հայաստանում։
Կիրիենկոն, իր ենթակայության տակ գտնվող գերատեսչությունների աշխատակիցների հետ միասին, «սկսել է աշխատել Հայաստանի թեմայով», ինչը, առաջին հերթին, «նշանակում է աշխատանք նախագահի շահերից ելնելով, քանի որ դա կապահովի պետական խնդիրների կատարումը», մեջբերում է «Վեդոմոստի»-ն իր աղբյուրներին։
Լրատվամիջոցն այդ ժամանակ նաև նշել էր, որ «կատարվելու է տեղեկատվական, այլ ոչ թե ընտրական աշխատանք», և որ Կիրիենկոյի օրակարգն արդեն ընթացքի մեջ է։
«Հայաստանի ղեկավարությունը գնալով ավելի է թեքվում դեպի Արևմուտք, ինչն անընդունելի է Ռուսաստանի պետական քաղաքականության տեսանկյունից»,- «Վեդեմոստի»-ին ասել էր աղբյուրներից մեկը։
ՌԲԿ-ի հաղորդումը մանրամասնում է նախագծի վերաբերյալ որոշ հարցեր և լրացուցիչ ապացույցներ տալիս այն մասին, թե որքան կարևոր է Հայաստանի աշխարհաքաղաքական կողմնորոշումը Կրեմլի համար։
Մինչ աղբյուրը նշել է, որ նախագիծը կտարածվի Անկախ Պետությունների Համագործակցության (ԱՊՀ) ինը երկրներում, ինչպես նաև Աֆրիկայում և այլ տարածաշրջաններում, 2026 թվականի հիմնական ուշադրության կենտրոնում կլինի Հայաստանը։ Նախագահական վարչակազմի կողմից ֆինանսավորումից բացի, ըստ ՌԲԿ-ի աղբյուրների, կառավարությունն ակնկալում է, որ այլ կազմակերպություններ, ինչպիսիք են Ռուսաստանի Միջազգային մարդասիրական համագործակցության դաշնային գործակալությունը (Ռոսսոտրուդնիչեստվո) և RT լրատվամիջոցը, նույնպես կունենան ներդրում այլ ձևերով։
Հայաստանում առաջադրանքներից մեկը, հավանաբար, կլինի վարչապետ Նիկոլ Փաշինյանի դեմ ընդդիմության մոբիլիզացիան ընտրություններից առաջ։ Մինչ Փաշինյանը պահպանել է հարաբերությունները Ռուսաստանի հետ՝ 2025 թվականի ընթացքում մի քանի անգամ այցելելով այդ երկիր, ազդեցիկ ռուս մեկնաբանները խստորեն քննադատել են նրան և չեն թաքցրել, որ կցանկանային տեսնել փոփոխություն Հայաստանի կառավարությունում և արևմտամետ կողմնորոշման մեջ։
Վերջին ամիսներին հայ և միջազգային փաստերի ստուգման մասնագետները նկատել են Հայաստանին ուղղված ապատեղեկատվության աճ, որը գալիս է ռուսական կամ Կրեմլի հետ կապված գործիչներից, ինչպես նաև թուրքական և ադրբեջանական աղբյուրներից։
Հայաստանի և Ռուսաստանի միջև երկկողմ կապերի ազատ անկումը մեծապես սկսվեց Ռուսաստանի և Մոսկվայի գլխավորած Հավաքական անվտանգության պայմանագրի կազմակերպության (ՀԱՊԿ) կողմից աջակցության բացակայությունից հետո՝ 2021 և 2022 թվականներին Հայաստանի վրա Ադրբեջանի հարձակումների ժամանակ։
Մեկ այլ կարևոր պատճառ էր Լեռնային Ղարաբաղում ռուս խաղաղապահների անգործությունը, երբ Ադրբեջանը տարածաշրջանը դրել էր ինը ամսվա շրջափակման մեջ և ստիպել նրան հանձնվել 2023 թվականի սեպտեմբերին տեղի ունեցած կայծակնային հարձակման ժամանակ։
Թարգմանությունը՝ Էմմա Չոբանյանի
