12.09.2026 | 14:22
Զելենսկին պատրաստ է Պուտինի հետ հանդիպել G20-ի գագաթնաժողովում
Քաղաքապետարանը չի բացահայտում՝ ում միջև և ինչ չափով է բաշխվել 634 մլն դրամի պարգևավճարը
Հասարակություն
14.01.2026 | 15:30
Երևանի քաղաքապետարանի 768 աշխատակից ստացել է «13-րդ աշխատավարձ». ընդհանուր գումարը կազմել է 253 միլիոն 999 հազար ՀՀ դրամ: Այս մասին Factor.am-ի գրավոր հարցմանն ի պատասխան հայտնել են Երևանի քաղաքապետարանից:
Բացի այդ, 641 աշխատակից ստացել է դեկտեմբեր ամսվա պարգևատրում։ Պարգևատրման ընդհանուր գումարը կազմել է 380 միլիոն 891 հազար դրամ։
Երևանի քաղաքապետարան ուղարկված գրավոր հարցմամբ խնդրել էինք նաև հստակեցնել, թե որ բաժնի կամ վարչության աշխատակիցներն են պարգևավճար ստացել և ինչ չափով։ Քաղաքապետարանից, հղում անելով «Անձնական տվյալների պաշտպանության մասին» օրենքի 26-րդ հոդվածի 1-ին մասին, հայտնել են, որ պարգևատրման չափի վերաբերյալ տեղեկատվություն չեն կարող տրամադրել։ Նշված հոդվածի առաջին մասը սահմանում է հետևյալը․
«Առանց անձնական տվյալների սուբյեկտի համաձայնության մշակողը կարող է անձնական տվյալները փոխանցել երրորդ անձանց կամ տվյալներից օգտվելու հնարավորություն տրամադրել, եթե դա նախատեսված է օրենքով և ունի բավարար պաշտպանության մակարդակ»։
Ստացվում է, որ համայնքի բյուջեից 634 միլիոն 890 հազար դրամ կամ շուրջ 1.66 միլիոն ԱՄՆ դոլար հատկացվել է քաղաքապետարանի աշխատակիցների պարգևատրման համար, սակայն հանրությունը չի կարող իմանալ, թե ովքեր են այդ աշխատակիցները և որքան է պարգևատրվել նրանցից յուրաքանչյուրը։
Արփի Հակոբյան
