Իրանի գլխավոր դատավորը չի բացառել արագացված դատավարությունները և ձերբակալված ցուցարարների զանգվածային մահապատիժները

Իրանի գլխավոր դատավոր Ղոլամհոսեյն Մոհսենի-Էջեին հայտարարել է, որ երկրի լայնածավալ բողոքի ցույցերի ժամանակ ձերբակալվածները կարող են զանգվածային մահապատժի ենթարկվել, հաղորդում է Associated Press-ը։ Մոհսենի-Էջեիի խոսքով՝ բողոքի ցույցերի ժամանակ ձերբակալվածները շուտով կենթարկվեն արագացված դատավարությունների և մահապատժի, գրում The Insider-ը։

«Եթե ուզում ենք աշխատանքն ավարտել, պետք է այն անենք հիմա։ Եթե այն ձգձգվի երկու կամ երեք ամիս, արդյունքը տարբեր կլինի։ Եթե ուզում ենք ինչ-որ բան ավարտել, պետք է դա արագ անենք»,- նրա խոսքերն է մեջբերում AP-ն։

Գործակալության փոխանցմամբ՝ Իրանի դատական ​​համակարգի ղեկավարը նաև չի բացառել, որ ձերբակալվածների մահապատիժները կարող են հրապարակային լինել։ Նա այս հայտարարությունն արել է բանտ այցելության ժամանակ, որտեղ պահվում են ցուցարարները։

Վերջին տվյալների համաձայն՝ երկրում տեղի ունեցած բողոքի ցույցերի հետևանքով զոհերի թիվը հասել է առնվազն 2500-ի: Այս տվյալները հրապարակել է Human Rights Activists News Agency-ն: Նախորդ օրը իրանական ընդդիմադիր Iran International հեռուստաալիքը հայտնել էր, որ զոհերի թիվը կարող է հասնել 12,000-ի: Այնուամենայնիվ, մարդու իրավունքների պաշտպաններն ու լրագրողները նշում են, որ ինտերնետի լիակատար անջատումը և երկրում ազատ լրատվամիջոցների բացակայությունը չափազանց դժվարացնում են զոհերի մասին տվյալների հավաքագրումն ու ստուգումը:

Դեկտեմբերի վերջից Իրանում զանգվածային բողոքի ցույցեր են տեղի ունենում։ Մասնավորապես, ԱՄՆ իշխանությունները բազմիցս աջակցություն են հայտնել ցուցարարներին։ ԱՄՆ նախագահ Դոնալդ Թրամփը նույնիսկ սպառնացել է հարվածել Իրանում թիրախներին, եթե իշխանությունները շարունակեն ուժով ցրել բողոքի ցույցերը։ Մեկ օր առաջ նա սոցիալական ցանցերում կոչ էր արել իրանցի ցուցարարներին շարունակել ցույցերը և վերահսկողություն հաստատել պետական ​​հաստատությունների նկատմամբ։

Թարգմանությունը՝ Էմմա Չոբանյանի