Գրենլանդիան պատկանում է իր ժողովրդին. եվրոպական առաջնորդները հակադարձում են Թրամփին

Մի շարք եվրոպացի առաջնորդներ հակադարձել են ԱՄՆ նախագահ Դոնալդ Թրամփի՝ Գրենլանդիան ԱՄՆ-ին միացնելու կոչերին, գրում է Al Jazeera-ն։

Յոթ եվրոպացի առաջնորդներ, այդ թվում՝ Ֆրանսիայի նախագահ Էմանուել Մակրոնը, Գերմանիայի կանցլեր Ֆրիդրիխ Մերցը և Մեծ Բրիտանիայի վարչապետ Քիր Սթարմերը, համատեղ հայտարարություն են տարածել, որում ասվում է, որ հանքանյութերով հարուստ արկտիկական կղզին «պատկանում է իր ժողովրդին»։

«Դանիայի և Գրենլանդիայի վերաբերյալ որոշումները պետք է կայացնեն միայն Դանիան և Գրենլանդիան», – ասվում է հայտարարության մեջ։

Դանիայի վարչապետ Մետտե Ֆրեդերիկսենը զգուշացրել է, որ ԱՄՆ-ի կողմից Գրենլանդիան զավթելու ցանկացած փորձ կհանգեցնի ՆԱՏՕ-ի ռազմական դաշինքի փլուզմանը։

Կիրակի օրը Թրամփը լրագրողներին ասել էր, որ «20 օրից կխոսի Գրենլանդիայի մասին»։ Նա պնդել է, որ Գրենլանդիան պետք է անցնի ԱՄՆ իրավասության ներքո, և նրա վերջին սպառնալիքը հնչել է ԱՄՆ ուժերի կողմից Վենեսուելայի առաջնորդ Նիկոլաս Մադուրոյի և նրա կնոջ առևանգումից ընդամենը մեկ օր անց։

«Եթե Միացյալ Նահանգները որոշի ռազմական հարձակում իրականացնել ՆԱՏՕ-ի մեկ այլ երկրի վրա, ապա ամեն ինչ կդադարի, ներառյալ՝ մեր ՆԱՏՕ-ն և, հետևաբար, Երկրորդ համաշխարհային պատերազմի ավարտից ի վեր ապահովված անվտանգությունը», -ասել է Ֆրեդերիկսենը դանիական TV2 հեռուստաալիքին։ Թրամփը չի բացառել Գրենլանդիայի նկատմամբ վերահսկողությունը ստանձնելու համար ռազմական ուժի կիրառումը։ Հրապարակայնորեն  անեքսիային աջակցող Լուիզիանայի նահանգապետ Ջեֆ Լենդրին անցյալ ամիս նշանակվել էր հանքանյութերով հարուստ արկտիկական կղզու հատուկ դեսպան։

Քեթի Միլլերը՝ Թրամփի աշխատակազմի ղեկավարի տեղակալ Սթիվեն Միլլերի կինը, շաբաթ օրը իր X-ի էջում հրապարակել է Դանիայի ինքնավար տարածքի պատկերը՝ ԱՄՆ դրոշի գույներով և գրել՝ «ՇՈՒՏՈՎ»։

Գրենլանդիայի վարչապետ Յենս-Ֆրեդերիկ Նիլսենը այդ գրառումն անվանել էր «անհարգալից»։

«Չկա ո՛չ խուճապի, ո՛չ էլ անհանգստության պատճառ։ Մեր երկիրը չի վաճառվում, և մեր ապագան չի որոշվում սոցիալական ցանցերի գրառումներով», – նշել է նա X-ում։

«Գրենլանդիայում ամենուրեք ռուսական և չինական նավեր են։ Գրենլանդիան անհրաժեշտ է ազգային անվտանգության տեսանկյունից, և Դանիան չի կարողանա դա անել», – հավելել է Թրամփը։

Նիլսենը փորձել է հանդարտեցնել կղզու բնակիչների շրջանում վախը։

«Մենք այնպիսի իրավիճակում չենք, որ մտածենք, թե երկիրը կարող է մեկ գիշերվա ընթացքում գրավվել, և այդ պատճառով էլ մենք պնդում ենք, որ ցանկանում ենք լավ համագործակցություն։ Իրավիճակն այնպիսին չէ, որ Միացյալ Նահանգները կարողանա պարզապես նվաճել Գրենլանդիան», – նշել է Նիլսենը։

Լեհաստանի վարչապետ Դոնալդ Տուսկը հայտարարել է, որ Դանիան կարող է հույս դնել ամբողջ Եվրոպայի համերաշխության վրա Գրենլանդիայի հարցում։

«Ոչ մի անդամ չպետք է հարձակվի կամ սպառնա Հյուսիսատլանտյան դաշինքի մեկ այլ անդամի։ Հակառակ դեպքում ՆԱՏՕ-ն կկորցնի իր իմաստը, եթե դաշինքի ներսում հակամարտություն կամ փոխադարձ հակամարտություններ տեղի ունենան», – ասել է Տուսկը։

Թարգմանությունը` Էմմա Չոբանյանի