Առաջիկայում Ադրբեջանից ոչ միայն նոր ներմուծում է հնարավոր, այլև Հայաստանից Ադրբեջան արտահանում. Պապոյան

Գառնիի Սուրբ Աստվածածին եկեղեցու բակում էկոնոմիկայի նախարար Գևորգ Պապոյանը լրագրողների հարցերին է պատասխանել։ Նախարարը հայտնել է, որ առաջիկայում Ադրբեջանից ոչ միայն նոր ներմուծում է հնարավոր, այլև Հայաստանից Ադրբեջան արտահանում։

«Այս պահի դրությամբ բավականին մրցունակ գին ենք ստացել վրացական երկաթուղուց, հետևաբար հնարավորությունները շատ են։ Ինչպես սովորական պրակտիկան է եղել, իրենք հայտարարել են, մենք հաստատել ենք։ Հերթական անգամ, կարծում եմ, վրացական, ադրբեջանական կողմը հերթական հաջող գործարքի մասին կհայտարարեն, դուք էլ մեզ հարցում կանեք, մենք էլ կհաստատենք»,-նշեց նա։

Հարցին՝ Հայաստանն ի՞նչ կարող է արտահանել Ադրբեջան, Պապոյանը նշեց՝  ապրանքների ցանկ կա։

«Ալյումին, ալյումինի փայլաթիթեղ, ֆեռոմոլիբդեն, կենդանիներ, միրգ-բանջարեղեն, որոշ տեսակի խմիչքներ, տարբեր տեսակի տեքստիլ արտադրանքներ, այսինքն՝ ցանկ կա, հետազոտություն կա, աշխատանք կա, որը ցույց է տալիս, որ այդ ապրանքները մենք արտահանում ենք և Ադրբեջանը ներմուծում է և հիմա այդ քննարկումների մեջ ենք»,-նշեց նա։

Հիշեցնենք՝ 3 տասնամյակից ավելի ընդմիջումից հետո վերականգնվել են Ադրբեջանի տարածքով դեպի Հայաստան երկաթուղային բեռնափոխադրումները։ Նոյեմբերի 6-ին Հայաստան է ժամանել ռուսական ցորենի առաջին խմբաքանակը՝ մոտ 1000 տոննա։ Դրան հաջորդել է ղազախական ցորենի խմբաքանակը՝ կրկին 1000 տոննա, որը Հայաստան է հասել նոյեմբերի 8-ին։ Ռուսաստանի Դաշնության տրանսպորտի նախարարությունը հայտարարել է, որ մինչև 2026 թվականի հունվարի վերջ նախատեսվում է այս երթուղով Հայաստան ուղարկել ևս 132 վագոն ցորեն։

Իսկ դեկտեմբերին հայկական երկու ընկերություն Ադրբեջանից բենզին գնեցին։ SOCAR AI-95 տեսակի բենզինի առաջին խմբաքանակը ՝ 22 վագոնի Հայաստան հասավ Վրաստանի տարածքով։ Սա երկու երկրների միջև տասնամյակների ընթացքում կնքված առաջին ուղղակի առևտրային գործարքն էր։ Գնել թե չգնել էժան ադրբեջանական բենզինը․ վերջին օրերին հանրության շրջանում թեժ քննարկումներ էին։