Մեծ Բրիտանիան, Ֆրանսիան, Գերմանիան և Թուրքիան պատրաստ են Ուկրաինա խաղաղապահներ ուղարկել

Մեծ Բրիտանիան, Ֆրանսիան, Գերմանիան և Թուրքիան պատրաստ են խաղաղապահ զորքեր ուղարկել Ուկրաինա պատերազմի ավարտից հետո։ Այս մասին «Новини Live»-ին տված հարցազրույցում հայտարարել է Ուկրաինայի նախագահի աշխատակազմի խորհրդական Միխայիլ Պոդոլյակը, փոխանցում է Meduza-ն։

«Հարց է առաջանում՝ ո՞վ է ամեն ինչ ֆինանսավորելու։ Ո՞վ է ներկա լինելու՝ ամեն ինչ միասնական համակարգի մեջ ինտեգրելու համար, և ո՞վ է մոդերացնելու Ռուսաստանին զսպելու գործընթացները։ Եվ այդ դեպքում հարց է առաջանում՝ արդյո՞ք պետք է ներկա լինեն այս գործում շահագրգռված այլ երկրների ներկայացուցիչները, ինչպիսին է Մեծ Բրիտանիան»,- ասել է Պոդոլյակը։

Հաղորդավարի հստակեցնող հարցին ի պատասխան՝ նա նշել է, որ «Ֆրանսիան՝ այո՛, Գերմանիան՝ այո՛», Թուրքիան «ևս ասում է, որ պատրաստ է»։

Կիևի արևմտյան դաշնակիցները 2024 թվականից ի վեր քննարկում են պատերազմից հետո Ուկրաինայի անվտանգությունն ապահովելու համար եվրոպական զորախումբ ուղարկելու հարցը, սակայն այս հարցում կոնսենսուս չկա։Դեկտեմբերի 15-16-ը Բեռլինում ամերիկացի և եվրոպացի դիվանագետների և ուկրաինական պատվիրակության միջև կայացած հանդիպումից հետո The New York Times-ը հաղորդել էէ, որ մշակված անվտանգության երաշխիքները ներառում են եվրոպական ուժերի տեղակայումը Ուկրաինայի տարածքում։

Վլադիմիր Զելենսկին հայտարարել էր, որ մի քանի երկրներ արդեն մասնավոր կերպով տվել են նման պարտավորություններ։

Ռուսաստանը կտրականապես դեմ է ՆԱՏՕ-ի զորքերի տեղակայմանը Ուկրաինայում, և դա անընդունելի է համարում։

Թարգմանությունը՝ Էմմա Չոբանյանի