Ես ինձ մեղավոր չեմ համարում. մանրամասներ Բաքվի դատարանում Դավիթ Բաբայանի ու Լևոն Մնացականյանի եզրափակիչ ելույթներից

Բաքվի զինվորական դատարանում Արցախի ղեկավարների շինծու գործերով հերթական դատական նիստը շարունակվել է հայ գերիների եզրափակիչ ելույթներով։ Արցախի նախկին ԱԳ նախարար Դավիթ Բաբայանը ներկայացրել է մեղադրող կողմի պնդումներին հակընդդեմ փաստարկներ և հայտարարել  անմեղության մասին։

«Ես ինձ մեղավոր չեմ համարում որևէ հոդվածով»,- ասել է Բաբայանը։

Արցախի ՊԲ նախկին հրամանատար Լևոն Մնացականյանն էլ նշել է, որ ցանկանում է իր եզրափակիչ խոսքն ասել ռուսերեն։ Նրան նման հնարավորություն է ընձեռվել։ Մնացականյանը մեկնաբանել է այն մեղադրանքը, որ պատերազմում վարձկաններ են կռվել հայկական կողմից։

«Նրանք բոլորը կամավորներ էին. ոչ ոք նրանց չի հավաքագրել, նրանք վարձատրություն չեն ստացել»,- հայտարարել է Լևոն Մնացականյանը:

Նա խոսել է նաև, այսպես կոչված, «տուժող» Իլհամ Մամեդովի ցուցմունքի մասին, որը հոկտեմբերի 2-ի դատական ​​նիստի ժամանակ իր ցուցմունքում նշել էր, թե, իբր, Հայաստանի զինված ուժերի ներկայացուցիչները ծեծել և խոշտանգել են իրեն, և որ իրեն ծեծող սպաների մեջ հատկապես դաժան է եղել Լևոն անունով սպան։ Նա նաև դատարանի դահլիճում մատնացույց է արել Լևոն Մնացականյանին։ Վերջինը պնդել է, որ  Մամեդովը չի խոշտանգվել։

Խոսելով 2016 թվականի ապրիլյան մարտերի մասին՝ Լևոն Մնացականյանն ասել է, որ այդ ժամանակ ինքը բանակի հրամանատար էր:

Հերքելով մեղադրական կողմի փաստարկները ապրիլյան մարտերի և տուժողների ցուցմունքների վերաբերյալ՝ Մնացականյանը նշել է, որ չեն հարձակվել ադրբեջանական զինվորականների դիրքերի վրա:

Դատական նիստը կշարունակվի դեկտեմբերի 23-ին:

Թարգմանությունը՝ Էմմա Չոբանյանի