Քաղաքականություն
16.12.2025 | 20:00«Ռուսաստանը դավաճանել է բոլորին, Հայաստանը պետք է դուրս գա ՀԱՊԿ-ից, ԵԱՏՄ-ից և ԱՊՀ-ից»,- Factor TV-ի հետ զրույցում պնդում է Հայաստանի շնորհապետական կուսակցության նախագահ, քաղաքագետ Գուրգեն Սիմոնյանը՝ անդրադառնալով Սերգեյ Լավրովի այն հայտարարությանը, թե ՌԴ-ն իր որևէ դաշնակցի չի դավաճանել․
Սիմոնյանը խիստ քննադատության է ենթարկել Ռուսաստանի՝ դաշնակցային պարտավորությունների չկատարումը և ՀՀ իշխանությունների վարած քաղաքականությունը։ Գուրգեն Սիմոնյանը նշել է, որ Ռուսաստանը դավաճանել է իր բոլոր դաշնակիցներին, այդ թվում՝ Բելառուսին և Հայաստանին․ «Ռուսաստանը չի դավաճանել մեկ դաշնակցի, իրեն էլ է դավաճանել։ Բելառուսին էլ է դավաճանել․․․ Ուղղակի Բելառուսը կարողանում է մանևրել։ Բելառուսին ինչքան հետ գցեցին ժողովրդավարական արժեհամակարգից․․․ Բելառուս ժողովուրդը կքած ա ում պատճառով՝ Ռուսաստանի պատճառով»,- նշել է քաղաքագետը։
Ըստ նրա՝ Հայաստանի Հանրապետությունը ևս դավաճանված է, ինչի վառ ապացույցը Արցախի կորուստն է և թշնամու կողմից Հայաստանին սպառնացող վտանգները․ «Հայաստանի Հանրապետությունը դավաճանված չի՞։ Ո՞նց դավաճանված չի։ Արցախը ու՞ր ա։ Մեր թշնամուն ռազմավարական օգնություն տրամադրեցին ամեն մակարդակով»,- ընդգծել է նա։
Նա նաև քննադատել է իշխանությունների տնտեսական քաղաքականությունը՝ նշելով, որ ԵԱՏՄ-ում մնալով եվրաինտեգրման մասին խոսելը խաբեություն է․ «Չի կարելի տևական ժամանակ մարդկանց կեղծիքով և ստով կերակրել․․․ Այն հայտարարությունները, որ Հայաստանի Հանրապետությունը շարժվում է դեպի ԵՄ, այս իշխանությունների օրոք չի լինելու»։
Անդրադառնալով երկրի ներսում գործող օտարերկրյա գործակալների կամ լրտեսների թեմային՝ Սիմոնյանը կոշտ քննադատության է ենթարկել իշխանությունների գործելաոճը։ Նա պնդում է, որ եթե իշխանությունը հայտարարում է գործակալների առկայության մասին, պարտավոր է նրանց ձերբակալել․ «Եթե հատուկ ծառայությունները զեկուցում են, որ էդ անձնավորությունը կուրատոր ունի, արդեն պարզ ա, որ լրտես ա․․․ ականջից բռնած դուրս բերեք, տարեք կալանավորեք։ Չի ծավալել՝ դուք ձեզ սրբի տեղ մի դրեք»,- ասել է նա։
Քաղաքագետը նաև հավելել է, որ եթե պետական պաշտոնյաները կամ ընդդիմադիր գործիչները սպասարկում են օտար պետության շահերը, նրանք պետք է ենթարկվեն քրեական պատասխանատվության․ «Եթե դու Հայաստանի Հանրապետությունում գործող քաղաքական ուժ ես, բայց սպասարկում ես Հայաստանի Հանրապետության ինքնիշխանության էրոզիայի մոտեցումը․․․ Սահմանադրական դատարանը պետք է արգելի այդ մարդկանց քաղաքական գործունեությունը»։
Հարցազրույցն ամբողջությամբ՝ տեսանյութում։
Ռոբերտ Անանյան
