09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
10 մարդ է զոհվել Սիդնեյի Բոնդի-Բիչ լողափում Հանուկայի տոնակատարության ժամանակ տեղի ունեցած հրաձգության հետևանքով
Քաղաքականություն
14.12.2025 | 14:50
Սիդնեյի հայտնի Բոնդի-Բիչ լողափում, հրեական Հանուկա տոնը նշելու ընթացքում տեղի ունեցած հրաձգության հետևանքով առնվազն 10 մարդ է զոհվել։ Այդ մասին հայտնել է Ավստրալիայի Նոր Հարավային Ուելս նահանգի ոստիկանությունը՝ նշելով, որ կրակ բացած երկու կասկածյալները վնասազերծվել են, փոխանցում է Euronews-ը։
«Հաստատվել է 10 մարդու մահը, այդ թվում՝ մեկ տղամարդու, որը, ըստ նախնական տվյալների, եղել է հրաձիգներից մեկը։ Երկրորդ ենթադրյալ հրաձիգը գտնվում է ծայրահեղ ծանր վիճակում»,-ասվում է ոստիկանության հաղորդագրությունում։
Այս պահին հաղորդվում է ևս 11 վիրավորի մասին, որոնցից երկուսը ոստիկանության աշխատակիցներ են։
Տեղական ժամանակով 19:30-ին Նոր Հարավային Ուելսի ոստիկանությունը X սոցիալական հարթակում հրապարակել է նախազգուշացում՝ կոչ անելով քաղաքացիներին զգուշավոր լինել, ապաստանել և խուսափել Բոնդի լողափ այցելելուց։
X սոցիալական ցանցում և այլ հարթակներում տարածվող տեսանյութերում երևում է, թե ինչպես են մարդկանց բազմությունը խուճապահար փախչում, իսկ ֆոնին լսվում են բազմաթիվ կրակոցների և ոստիկանության ազդանշանների ձայները։ Ականատեսների խոսքով՝ նրանք լսել են մոտ 50 կրակոց։
Իսրայելի նախագահ Իսահակ Հերցոգը հայտարարել է, որ տեղի ունեցածը հարձակում է եղել հրեական համայնքի դեմ։
«Այս հենց պահին մեր քույրերն ու եղբայրները Սիդնեյում, Ավստրալիայում, ենթարկվել են նողկալի ահաբեկիչների հարձակմանը՝ հրեաների դեմ իրականացված դաժան գործողության ընթացքում, երբ նրանք հավաքվել էին Բոնդի լողափում՝ Հանուկայի առաջին մոմը վառելու համար»,-Հերցոգի խոսքերն է մեջբերում նրա աշխատակազմը։
Բոնդի-Բիչ լողափը Սիդնեյում Ավստրալիայի ամենահայտնի լողափն է, որը գրավում է մեծ թվով սերֆերների, լողորդների և զբոսաշրջիկների։
