19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
Անհայտ անձինք կրակ են բացել Ավստրալիայի լողափում
Քաղաքականություն
14.12.2025 | 13:41
Ավստրալիայի Նոր Հարավային Ուելս նահանգի ոստիկանությունը կիրակի՝ դեկտեմբերի 14-ին, ձերբակալել է երկու մարդու՝ Սիդնեյի հանրահայտ Բոնդի-Բիչ լողափում տեղի ունեցած կրակոցների մասին հաղորդումներից հետո, փոխանցում է DW-ն։
Ոստիկանության՝ սոցիալական ցանցերում հրապարակված հայտարարության համաձայն՝ հատուկ գործողությունը շարունակվում է։ Իրավապահ մարմինները քաղաքացիներին կոչ են անում խուսափել այդ տարածքից, իսկ լողափի շրջանում գտնվողներին՝ պատսպարվել անվտանգ վայրերում։
Sydney Morning Herald թերթը հայտնում է, որ ենթադրյալ կրակողներից մեկը վիրավորվել է ոստիկանության կողմից, իսկ մյուսը՝ ձերբակալվել։ Բացի այդ, Sky և ABC հեռուստաընկերությունների կադրերից երևում է, որ առնվազն մի քանի մարդ վիրավորվել է։ Տուժածների վերաբերյալ մանրամասներ առայժմ չկան։
Իսրայելի նախագահ Իսահակ Հերցոգը հայտարարել է, որ տեղի ունեցածը հարձակում է եղել հրեական համայնքի դեմ։
«Այս հենց պահին մեր քույրերն ու եղբայրները Սիդնեյում, Ավստրալիայում, ենթարկվել են նողկալի ահաբեկիչների հարձակմանը՝ հրեաների դեմ իրականացված դաժան գործողության ընթացքում, երբ նրանք հավաքվել էին Բոնդի լողափում՝ Հանուկայի առաջին մոմը վառելու համար»,-Հերցոգի խոսքերն է մեջբերում նրա աշխատակազմը։
Բոնդի-Բիչ լողափը Սիդնեյում Ավստրալիայի ամենահայտնի լողափն է, որը գրավում է մեծ թվով սերֆերների, լողորդների և զբոսաշրջիկների։
