Դուբայում ընթացող բռնցքամարտի աշխարհի առաջնության կիսաեզրափակիչում Հայաստանի երրորդ ներկայացուցիչը ևս պարտություն կրեց ու դարձավ բրոնզե մեդալակիր։
2022թ․ Եվրոպայի փոխչեմպիոն Ռաֆայել Հովհաննիսյանը (86 կգ) եզրափակիչի ուղեգիրը վիճարկեց բելառուս Ալեքսեյ Ալֆիորաուի հետ ու առաջին ռաունդում պարտվեց նոկաուտով։
Ավելի վաղ կիսաեզրափակիչում պարտվել ու բրոնզե մեդալակիր էին դարձել նաև Արթուր Բազեյանը (60 կգ) և Հովհաննես Բաչկովը (67 կգ)։ Տոկիոյի Օլիմպիական խաղերի բրոնզե մեդալակիր, Եվրոպայի եռակի չեմպիոն Հովհաննես Բաչկովը (67 կգ) կարիերայի 5-րդ բրոնզե մեդալն էր նվաճել աշխարհի առաջնությունում։
Դեկտեմբերի 11-ին եզրափակիչի ուղեգրի համար կմենամարտեն նաև Ռուդոլֆ Գարբոյանը (51 կգ) և Դավիթ Չալոյանը (+92 կգ)։ Կիսաեզրափակիչում Ռուդոլֆ Գարբոյանի մրցակիցը կլինի ուզբեկ Հասանբոյ Դուսմատովը, իսկ Դավիթ Չալոյանն ուժերը կչափի Ուզբեկստանի մեկ այլ ներկայացուցիչ Արման Մախանովի հետ։
Աշխարհի առաջնությանը 13 քաշային կարգում մասնակցում է 108 երկրի 428 բռնցքամարտիկ, Հայաստանի հավաքականը մրցավայր է մեկնել 14 մասնակցով։ ԱԱ-ի մրցանակային հիմնադրամը ռեկորդային 8 միլիոն դոլար է։ Աշխարհի չեմպիոնները կստանան 300 հազար դոլար, փոխչեմպիոնները՝ 150 հազար, բրոնզե մեդալակիրները՝ 75 հազար, իսկ 5-րդ տեղ գրաված բռնցքամարտիկները՝ 10 հազար։
