29.06.2026 | 23:11
ԱԱ-2026. Բրազիլացիները կամային հաղթանակով դուրս եկան 1/8 եզրափակիչ. ՏԵՍԱՆՅՈՒԹ
Բռնցքամարտի ԱԱ․ Հովհաննես Բաչկովն ու Արթուր Բազեյանը՝ բրոնզե մեդալակիրներ․ ՏԵՍԱՆՅՈՒԹ
11.12.2025 | 18:19
Տոկիոյի Օլիմպիական խաղերի բրոնզե մեդալակիր, Եվրոպայի եռակի չեմպիոն Հովհաննես Բաչկովը (67 կգ) կարիերայի 5-րդ բրոնզե մեդալը նվաճեց բռնցքամարտի աշխարհի առաջնությունում։
Դուբայում շարունակվող աշխարհի առաջնության կիսաեզրափակիչում 33-ամյա բռնցքամարտիկը պարտվեց ռուսաստանցի Եվգենի Կոլին ու դարձավ բրոնզե մեդալակիր։
Եզրափակիչում Եվգենի Կոլի մրցակիցը կլինի գործող օլիմպիական չեմպիոն, ուզբեկ Ասադխուժա Մույդինխուժաևը։
Հովհաննես Բաչկովն աշխարհի առաջնության բրոնզե մեդալակիր դարձել էր նաև 2017, 2019, 2021 և 2023 թվականներին։
Եվրոպայի փոխչեմպիոն Արթուր Բազեյանը (60 կգ) կիսաեզրափակիչում պարտվեց Փարիզի Օլիմպիական խաղերի չեմպիոն, ուզբեկ Աբդումալիկ Խալոկովին և նույնպես արժանացավ բրոնզե մեդալի։
Դեկտեմբերի 11-ին աշխարհի առաջնության եզրափակիչի ուղեգրի համար կմենամարտեն նաև Ռուդոլֆ Գարբոյանը (51 կգ), Ռաֆայել Հովհաննիսյանը (86 կգ) և Դավիթ Չալոյանը (+92 կգ)։
Կիսաեզրափակիչում Ռուդոլֆ Գարբոյանը կմրցի ուզբեկ Հասանբոյ Դուսմատովի հետ, Ռաֆայել Հովհաննիսյանի մրցակիցը կլինի բելառուս Ալեքսեյ Ալֆիորաուն, իսկ Դավիթ Չալոյանն ուժերը կչափի ուզբեկ Արման Մախանովի հետ։
Աշխարհի առաջնությանը 13 քաշային կարգում մասնակցում է 108 երկրի 428 բռնցքամարտիկ, Հայաստանի հավաքականը մրցավայր է մեկնել 14 մասնակցով։ ԱԱ-ի մրցանակային հիմնադրամը ռեկորդային 8 միլիոն դոլար է։ Աշխարհի չեմպիոնները կստանան 300 հազար դոլար, փոխչեմպիոնները՝ 150 հազար, բրոնզե մեդալակիրները՝ 75 հազար, իսկ 5-րդ տեղ գրաված բռնցքամարտիկները՝ 10 հազար։
