Նոր միջադեպ՝ Փառանձեմ Մեյթիխանյանի ամուսնու սպանության գործով մեղադրյալ Արտաշես Չիչոյանի մասնակցությամբ

Լեզվաբան, ԵՊՀ դասախոս Փառանձեմ Մեյթիխանյանի ամուսնու սպանության գործով մեղադրյալ Արտաշես Չիչոյանը նոր միջադեպի կենտրոնում է հայտնվել, բայց այս անգամ, ամենայն հավանականությամբ, ոչ թե մեղադրյալի, այլ տուժողի կարգավիճակով։

Դեկտեմբերի 5-ին Երևանի Դավիթ Բեկ փողոցում կրակոցներ են հնչել, որի հետևանքով, ըստ իրավապահների, Արտաշես Չիչոյանը ոտքի շրջանում վնասվածք է ստացել։ Միջադեպից հետո քրեական վարույթ է նախաձեռնվել Քրեական օրենսգրքի 297-րդ հոդվածի 3-րդ մասի և 335-րդ հոդվածի 1-ին մասի հատկանիշներով, այսինքն՝ զենքի գործադրմամբ խուլիգանությունը և ապօրինի զենք կրելը։ 

Մեզ հայտնի չէ, թե դեպքի վերաբերյալ իրավապահներին ինչ է պատմել Չիչոյանը, արդյոք ընդունո՞ւմ է միջադեպին իր մասնակցության հանգամանքը, թե՞ ոչ։

Նշենք, որ Չիչոյանը Մեյթիխանյանի ամուսնու սպանության գործով մոտ 8 տարի կալանքի տակ մնալուց հետո 2024-ի տարեվերջին ազատվել է կալանքից, և նրա նկատմամբ խափանման միջոց է ընտրվել վարչական հսկողությունը։  Նոր միջադեպն ինչ ազդեցություն կունենա ընտրված վարչական հսկողություն խափանման միջոցի վրա, պարզ կլինի այդ գործով առաջիկա դատական նիստին։

Հիշեցնենք, որ Եղիշե Խաչատրյանը սպանվել էր 2016 թվականին Նուբարաշենի խճուղում վթարային իրավիճակին հաջորդած ծեծկռտուքի ընթացքում 75-ամյա մոր աչքի առաջ։  

Գործը 8 տարի քննվելուց հետո դատավորի լիազորությունները դադարեցվել են։  2024-ի տարեվերջին սպանության գործի քննությունը սկսվել է զրոյից՝ դատավոր Կարեն Ֆարխոյանի վարույթում։ Ֆարխոյանը նրա նկատմամբ ընտրված կալանքը փոխել է վարչական  հսկողությամբ։

Գործի երկարատև քննությունից դժգոհում են և՛ տուժող կողմը, և՛ մեղադրյալները։ 4 մեղադրյալ 8 տարի կալանքի տակ է եղել, իսկ հինգերորդը  մահացել է քրեակատարողական հիմնարկում, այսինքն՝ գտնվելով պետության հսկողության ներքո։ 

Արաքս Մամուլյան