«Մաղարիչի» դեմ պայքարի նոր գործիք. օպերատիվ-հետախուզական միջոցառումներ կիրականացվեն՝ անկախ հանցանքի ծանրության աստիճանից

Առաջարկվում է այսուհետ օպերատիվ-հետախուզական միջոցառումներ իրականացնել կաշառք տալու կամ ստանալու ենթադրյալ հանցանք նախապատրաստող կամ կատարած անձանց նկատմամբ՝ անկախ հանցանքի ծանրության աստիճանից: Այս մասին նշվում է Արդարադատության նախարարության կողմից հանրային քննարկման ներկայացված նախագծում։

Գործող օրենսդրությամբ՝ օպերատիվ-հետախուզական միջոցառումներ կարելի է անցկացնել միայն այն դեպքերում, երբ առերևույթ առկա են հիմքեր՝ կասկածելու, որ անձը, որի նկատմամբ պետք է դրանք անցկացվեն, կատարել է ծանր կամ առանձնապես ծանր հանցագործություն։

Արդարադատության նախարարության հիմնավորման մեջ նշվում է, որ օրենքով նախատեսված նման սահմանափակումը գործնականում առաջացնում է դժվարություններ կոռուպցիոն հանցանքների, մասնավորապես, կաշառք տալու, ստանալու, հայտնաբերելու, կանխելու, խափանման և բացահայտման համար:

«Կոռուպցիայի դեմ պայքարի առօրյա աշխատանքի վերլուծությունից պարզ է դառնում, որ հիմնականում պաշտոնատար անձանց պարգև կամ ավետչեք (մաղարիչ) տալու դեպքերը դասվում են ոչ մեծ կամ միջին ծանրության հանցագործությունների շարքին և հաշվի առնելով այն հանգամանքը, որ տվյալ հանցատեսակների սուբյեկտները փոխադարձ շահագրգռվածություն ունեն և խուսափում են հանցագործության մասին հաղորդում ներկայացնելուց, նման պայմաններում ՕՀԳ իրականացնող մարմինները զրկված են կոռուպցիոն նման դրսևորման դեմ պայքարի անհրաժեշտ գործիքակազմից, իսկ ներկա պահին օրենքով թույլատրելի միջոցառումները չեն լուծում այդ խնդիրները»,- նշվում է նախագծում:

Նախագիծն ամբողջությամբ՝ այստեղ։

Եվգենյա Համբարձումյան