Վրաստանի ՆԳՆ-ն Թբիլիսիում բնակվող ռուս ակտիվիստների է ձերբակալել

Թբիլիսիում անհետացած ռուս ակտիվիստներ Վլադիմիր Դուբովսկին և Ալինա Սավելևան ձերբակալվել են Վրաստանի ՆԳՆ աշխատակիցների կողմից։ Գերատեսչության տվյալներով՝ ձերբակալված ռուսները մեղադրվում են Վրաստանի պետական ​​սահմանը անօրինական կերպով հատելու մեջ (Վրաստանի քրեական օրենսգրքի 344-րդ հոդվածի 2-րդ մաս, որը պատժվում է մինչև հինգ տարի ազատազրկմամբ), գրում է Meduza-ն։

Քննության տվյալներով՝ Դուբովսկին և Սավելևան անօրինական կերպով մուտք են գործել Վրաստան, որտեղ ապրել են երեք տարի: Նրանք բազմիցս դիմել են Վրաստանի Ներքին գործերի նախարարության միգրացիայի վարչություն՝ ապաստան խնդրելու համար, սակայն մերժվել են՝ «ապաստան խնդրողների համար գործող չափանիշներին չհամապատասխանելու» պատճառով, հայտարարել է նախարարությունը։

Զույգը բողոքարկել է այս որոշումը, սակայն դատարանները երկու անգամ այն ​​ուժի մեջ են թողել։

Ռուսների ձերբակալման օրդերը դատարանը տվել է նոյեմբերի 12-ին. նրանք ներկայում նախնական կալանքի տակ են։

Դուբովսկիի և Սավելևայի անհետացման մասին հայտնի էր դարձել նոյեմբերի 27-ին: Ռուսների առևանգման մասին հայտարարել էր Դուբովսկիի կողմից համահիմնադրված «Պատմական հողերում ուկրաինացիների միավորում»  կազմակերպությունը:

Վլադիմիր Դուբովսկին և Ալինա Սավելևան «Зелений Клин – моя батьківщина» շարժման առաջնորդներն են։

Դուբովսկին Ալեքսեյ Նավալնիի՝ Վլադիվոստոկում գտնվող շտաբի համակարգողն է եղել, Ռուսաստանի Լիբերտարիանական կուսակցության անդամ։ Նախկին համախոհները՝ ընդդիմադիր քաղաքական գործիչներ Միխայիլ Սվետովը և Լեոնիդ Վոլկովը, նրան մեղադրել են ռուսական հատուկ ծառայությունների համար աշխատելու մեջ։

2024 թվականին Ռուսաստանի իշխանությունները Դուբովսկիին ներառել են ահաբեկիչների և ծայրահեղականների ցուցակում: Ակտիվիստի համախոհները հայտնել են, որ Դուբովսկին Ռուսաստանում հետախուզվում է ահաբեկչության, իսկ Սավելևան՝ «բանակի մասին կեղծ լուրեր» տարածելու համար:

Թարգմանությունը՝ Էմմա Չոբանյանի