Խաղաղության պայմանագրում ադրբեջանական նախապայմանները մտահոգիչ են․ Մարկ Մոնտգոմերին՝ վաշինգտոնյան համաձայնությունների մասին․ ՏԵՍԱՆՅՈՒԹ

Հայաստանի և Ադրբեջանի միջև խաղաղության համաձայնագրի կնքումը մարտահրավեր է ԱՄՆ-ի համար։ Independence Avenue Media-ին տված հարցազրույցում այս մասին հայտարարել է պաշտոնաթող ամերիկացի ծովակալ, FDD-ի կիբեր և տեխնոլոգիական նորարարությունների կենտրոնի ավագ տնօրեն Մարկ Մոնտգոմերին՝ պատասխանելով հարցին՝ արդյո՞ք ԱՄՆ-ն այս պահից սկսած ավելի ներգրավված կլինի Հարավային Կովկասում։

«Ես հաճախ եմ այցելել Հայաստան 1980-ականների սկզբին, և երկիրը զարգացման ու արտադրողականության շարժիչ ուժ էր ամբողջ Խորհրդային Միության համար։ Այն յուրահատուկ վայր է՝ եզակի աշխատուժով, այդ ժամանակվա հիանալի ակադեմիական հաստատություններով։ Այսպիսով, Հայաստանում կա հնարավորություն ու ներուժ, և գուցե նախագահը կամ նախագահի մարդիկ տեսնեն դա և օգտվեն դրանից»,- ասել է Մարկ Մոնտգոմերին։

Ամերիկացի գործիչը, սակայն, մտահոգություն է հայտնել օգոստոսի 8-ին Վաշինգտոնում ստորագրված խաղաղության պայմանագրի որոշ դրույթների հետ կապված։

«Ես մի փոքր մտահոգված եմ, որ պայմանագիրը պարունակում է ադրբեջանական նախապայմաններ, որոնք, հավանաբար, անընդունելի են և պահանջում են սահմանադրական փոփոխություններ, որոնք կարող են տեղի չունենալ։ Եվ նախագահի հետ կապված խնդիրն այն է, թե ում է նա համարում խնդրի պատասխանատու։ Մենք պետք է տեսնենք, թե ինչ զարգացումներ կլինեն հաջորդ վեցից տասներկու ամիսների ընթացքում։ Բայց կարծում եմ՝ կա հնարավորություն Հայաստանում։ Հիշում եմ, որ 40 տարի առաջ Հայաստանում կենսունակ էր և խթանում էր տնտեսական աճը շատ ավելի մեծ միավորման կազմում։ Այսպիսով, հնարավորություն ունենալով՝ կրկին, ճիշտ ռեսուրսներով, կարծում եմ՝ Հայաստանը կարող է հաջողակ լինել։ Պարզապես չգիտեմ՝ նախագահ Թրամփը պատրա՞ստ է, արդյոք, այդ ներդրումը կատարել»,- նշել է Մոնտգոմերին։

Անդրադառնալով 2026 թվականին Հայաստանում սպասվող ընտրություններին և դրանց արդյունքների վրա ազդելու՝ Ռուսաստանի փորձի կանխատեսումների մասին հարցին, Մարկ Մոնտգոմերին ընդգծել է՝ Մոսկվան այդ հնարավորությունը երբեք բաց չի թողնում։

«Ռուսաստանը երբեք բաց չի թողել ժողովրդավարական ընտրություններին միջամտելու հնարավորությունը։ Եվ սոցիալական ցանցերի միջոցով ազդեցության գործողություններ իրականացնելու հավանականությունը, ինչպես նաև կաշառակերության ավանդական մեթոդները կիրառելը աննախադեպ է ամբողջ աշխարհում և, անկասկած, զգացվում է Արևելյան Եվրոպայում։ Եթե մտածում եք Ռումինիայի, Մոլդովայի մասին, նրանք վերջին երեք տարիների ընթացքում իրենց այդպես ներգրավելու ուժեղ փորձ ունեն։ Այո, ես նույնպես մտահոգված եմ դրանով»,- հայտարարել է Մոնտգոմերին։

Հարցազրույցը պատրաստվել է Factor TV-ի գործընկեր Independent Avenue Media-ի կողմից

Թարգմանությունը՝ Էմմա Չոբանյանի