ՏԱՐԱԿԱՐԾԻՔ. Ծխե՞լ, թե՞ չծխել․ ԱՆ նոր օրինագիծը՝ քննադատությունների թիրախում. ՏԵՍԱՆՅՈՒԹ

Առողջապահության նախարարությունը ծխելու դեմ պայքարի նոր օրինագիծ է մշակել, որով մի շարք սահմանափակումներ ու արգելքներ են նախատեսվում:

Նոր օրենքի ընդունումից հետո ծխելն արգելված կլինի փակ և կիսափակ հանրային տարածքներում, այդ թվում՝ շքամուտքերում, աշխատանքային տարածքներում, բուժհաստատություններում, ուսումնական հաստատություններում, երեխաների համար նախատեսված խաղահրապարակներում, պատմության և մշակույթի անշարժ հուշարձանների տարածքներում,  հասարակական տրանսպորտի կանգառների ծածկերի տակ և այլն:

Ըստ նոր նախագծի ծխախոտի գովազդի բոլոր ձևերը նույնպես անթույլատրելի կլինեն: Նաև կարգելվի ծխախոտային արտադրատեսակների հրապարակային ցուցադրումը վաճառասրահներում: Այսինքն՝ շատ խանութներում ու սուպերմակետներում աչքի ընկնող և ծխախոտներով բեռնված ստենդերն այլևս չեն լինի: Վաճառողները դրա փոխարեն իրենց մոտ կունենան ծխախոտի արտադրատեսակների ցանկը՝ դրանց գներով, որը կտրամադրվի չափահաս գնորդին՝ նրա պահանջով:

Այս ամենը խախտելու դեպքում տուգանքների առավելագույն շեմը 800 հազար դրամն է: Այդքան նախատեսված է, օրինակ, ծխախոտային արտադրատեսակներ գովազդելու դեպքում: Տույժի կենթարկվի գովազդատուն:

Հասարակական տրանսպորտում ծխելու համար անձը կտուգանվի 50 հազար դրամով: Մասնավոր տրանսպորտային միջոցի վարորդն ընթացքի ժամանակ ծխելու համար կտուգանվի 10 հազար դրամով:

Ծխախոտային արտադրատեսակների վաճառքի կանոնների խախտումը կառաջացնի տուգանքի նշանակում 100 հազար դրամի չափով, այդ թվում՝ անչափահասներին վաճառելը: Զեղչ կիրառելն, օրենքի նախագծով, առավել ծանր «հանցանք» է համարվում և դրա համար նախատեսվող տույժը 200 հազար դրամ է: Նույնքան տուգանք կկիրառվի վաճառասրահներում դրանք ցուցադրելու համար:

Նոր նախագիծը հանրության շրջանում բուռն քննարկումների առիթ է դարձել: Շատերը կարծում են, որ նախագիծը թերի է մշակված է, ոմանք էլ պնդում են, որ  այն մարդու իրավունքի ոտնահարում է: Ի վերջո՝ ծխե՞լ, թե՞ չծխել…