Ռուսական հարձակման հետևանքով Խարկովում մեկ մարդ է զոհվել․ վնասվել են Օդեսայի մարզի նավահանգստային ենթակառուցվածքները

Ռուսաստանը հոկտեմբերի լույս 5-ի գիշերն Ուկրաինայի ուղղությամբ արձակել է 205 անօդաչու թռչող սարք, որոնցից 172-ը խոցվել են, հայնում է Ուկրաինայի զինված ուժերի ռազմաօդային ուժերի հրամանատարությունը։

Խարկովում մեկ մարդ զոհվել է, ևս վեցը՝ վիրավորվել, հայտնել է Ուկրաինայի արտակարգ իրավիճակների պետական ծառայությունը։ Ռուսական զինուժը հարվածել է քաղաքի Ինդուստրիալնի շրջանին։ Հրդեհվել են երկհարկանի վարչական շենք և ավտոմեքենաներ, վնասվել են բնակելի, վարչական և արտադրական շենքեր։

Խարկովի քաղաքապետ Իգոր Տերեխովը հայտնել է, որ Ռուսաստանը քաղաքի վրա հարձակվել է «Բանդերոլ» տեսակի անօդաչու հրթիռներով։ Խարկովի մարզային ռազմական վարչակազմի ղեկավար Օլեգ Սինեգուբովը հայտնել է վեց տուժածի մասին։

Օդեսայի մարզը նույնպես գիշերը ենթարկվել է զանգվածային հարձակման։ Օդեսայի մարզային ռազմական վարչակազմի ղեկավար Օլեգ Կիպերը հայտնել է, որ հարվածի տակ են հայտնվել արդյունաբերական և նավահանգստային ենթակառուցվածքները, ինչպես նաև քաղաքի ամառանոցային հատվածը։

«Խոշոր հրդեհներ են բռնկվել։ Ուժեղ ծխապատվածության պատճառով Օդեսայի արտակարգ իրավիճակների պետական ծառայության ճառագայթային, քիմիական և կենսաբանական պաշտպանության մասնագետները տարածքի ուսումնասիրություն են իրականացրել։ Վտանգավոր նյութեր չեն հայտնաբերվել»,- հայտնել է նա։

Այստեղ տուժածներ չկան։ Ուկրաինայի արտակարգ իրավիճակների պետական ծառայությունից նշել են, որ հրշեջները աշխատել են ծայրահեղ բարդ պայմաններում՝ բարձր ջերմաստիճանի և օդային տագնապի կրկնվող ազդանշանների պատճառով։

Ռուսաստանի պաշտպանության նախարարությունից հայտնել են, որ Ուկրաինայի Խարկովի մարզում հարված է հասցվել  Կոչետոկի էլեկտրական ենթակայանին, իսկ Օդեսայի մարզում՝ Վիլկովո նավահանգստային կետին, Չեռնոմորսկի նավահանգստում վառելիքաքսանյութերի պահեստի և երկու բեռնատար նավի։

Թարգմանությունը՝ Էմմա Չոբանյանի