19.05.2026 | 23:56
Հայաստանի մի շարք հասցեներում էլեկտրաէներգիայի անջատումներ կլինեն
Կարապետյանը 3 ամիս ժամանակ ունի․ ՀԷՑ-ի գույքը կվաճառի՞, թե՞ գերակա շահը կգործի. ՏԵՍԱՆՅՈՒԹ
Քաղաքականություն
17.11.2025 | 20:50
Երեք օր նիստ գումարելուց հետո Հանրային ծառայությունները կարգավորող հանձնաժողովն այսօր քվեարկեց․ չորս կողմ և մեկ դեմ ձայներով դադարեցվեց ՀԷՑ-ի էլեկտրաէներգիայի բաշխման լիցենզիան: Հանձնաժողովի նախագահ Մեսրոպ Մեսրոպյանը լրագրողների հետ ճեպազրույցում ասաց, որ լիցենզիայի դադարեցմանը պետք է հաջորդեն գործընթացներ։
«Առաջիկա 3 ամիսներին պետությունը սեփականատիրոջ կամ ՓԲԸ-ի տնօրենների խորհրդի հետ կսկսի բանակցել գույքի սեփականության իրավունքի փոխանցման վերաբերյալ։ Եթե այդ 3 ամիսների ընթացքում կողմերը չգան համաձայնության, ապա դրանից հետո պետությունը կարող է գերակա շահի իրավունքով վերցնել այդ սեփականության իրավունքը»,- ասաց Մեսրոպյանը:
ՀԷՑ-ի գործով վարչական լսումներն անցնում էին լարված, փոխադարձ մեղադրանքներով։ ՀԾԿՀ աշխատակազմը ներկայացրեց ծավալուն զեկույց՝ պնդելով, որ ՀԷՑ-ում խախտումները եղել են համակարգված և համատարած։ Այնինչ, ըստ ՀԷՑ-ի գլխավոր տնօրենի նախկին պաշտոնակատար Դավիթ Ղազինյանի, վարույթում որևէ ապացույց չկա, որ խախտումները եղել են։
Նրա այսօրվա ելույթի ընթացքում իրավիճակը լարվեց․ ՀԷՑ-ի ժամանակավոր կառավարիչ Ռոմանոս Պետրոսյանը Ղազինյանին կոռեկտության կոչ արեց։ Հանձնաժողովի նախագահը ևս դիմեց տնօրենի նախկին պաշտոնակատարին՝ վիրավորական գնահատակներ չտալ։
Այս օրերին «Տաշիր Կապիտալ»-ի փաստաբանների ներկայացրած բացարկի բոլոր միջնորդությունները հանձնաժողովը մերժեց։ Փաստաբան Արամ Օրբելյանն այսօր ելույթում նշեց, որ հանձնաժողովը քվեարկելու է մի նախագծի վերաբերյալ, որով վարույթ գոյություն չունի։
Նախագծին դեմ քվեարկած հանձնաժողովի անդամ Արա Նռանյանն էլ հատուկ կարծիք հայտնեց, որ ՀԷՑ-ի լիցենզիայի մասով վարույթը պետք է կարճվեր, քանի որ ՍԴ-ում և Վարչական դատարանում կան վարույթներ, որոնք կարող էին ազդել որոշման վրա։ Մեսրոպյանն էլ ասում է՝ այս փուլում դժվար է կանխատեսել, թե ինչ սցենարով կլինի ընթացքը։
Մանրամասները՝ տեսանյութում։
Անի Թամրազյան
