Զինամթերք չի եղել․ Թուրքիայի ՊՆ-ն հայտնել է՝ կործանված ինքնաթիռն ինչ է տեղափոխել Ադրբեջան

Թուրքիայի պաշտպանության նախարարությունը մանրամասներ է հայտնել Ադրբեջան-Վրաստան սահմանին վթարի ենթարկված C-130 ռազմական բեռնատար ինքնաթիռի վերաբերյալ։ Մասնավորապես, նշվում է, որ նոյեմբերի 11-ին C-130E տրանսպորտային ինքնաթիռը տեղի ժամանակով 09:02-ին թռիչք է կատարել Կայսերիից՝ Ադրբեջանի Գյանջա անձնակազմ և բեռներ տեղափոխելու առաքելությամբ: Այն անվտանգ վայրէջք է կատարել Գյանջայում ժամը 11:06-ին։

Ըստ հայտարարության՝ ժամը 13:15-ին այն 20 հոգանոց անձնակազմով մեկնել է դեպի հրամանատարության 5-րդ գլխավոր  բազա (Մերզիֆոն)՝ Հաղթանակի օրվա (Բաքվում նոյեմբերի 8-ին կայացած ռազմական շքերթը) տոնակատարությունների շրջանակում Ադրբեջանում թուրքական F-16 կործանիչների համար տեխնիկական անձնակազմ և տարբեր պարագաներ հասցնելու համար։ Նշվում է, որ Ադրբեջանում թռիչքներ կատարող թուրքական F-16-երի 10 հոգանոց տեխնիկական սպասարկման համար թիմը ժամը 13:15-ին կրկին թռիչք է կատարել՝ ընդհանուր 20 հոգանոց անձնակազմով, որպեսզի տեղափոխվի 5-րդ գլխավոր ռեակտիվ բազա (Մերզիֆոն)՝ ինքնաթիռների համար տարբեր տեխնիկական սպասարկման նյութեր հասցնելու նպատակով։

Թռիչքից հետո ժամը 13:50-ին վերջնական ռադիոկապ է հաստատվել Թբիլիսիի օդային երթևեկության վերահսկողության ծառայության հետ։ Այդ ժամից հետո ինքնաթիռի հետ ռադիոկապը և ռադարը կորել են։

Ժամը 14:34-ին հաղորդվել է, որ թուրքական ինքնաթիռը դեռևս անհայտ պատճառներով վթարի է ենթարկվել Թբիլիսիից հարավ՝ Ադրբեջան-Վրաստան սահմանի մոտ։ Միջադեպի մասին իմանալուց հետո որոնողական-փրկարարական աշխատանքներն անմիջապես սկսվել են՝ համաձայնեցված Ադրբեջանի և Վրաստանի իշխանությունների հետ, միաժամանակ, տարածաշրջան է ուղարկվել անօդաչու թռչող սարք։

Թուրքիայի ՊՆ-ն ընդգծել է, թե ինքնաթիռը տեղափոխել է անձնակազմ և ինքնաթիռի սպասարկման պարագաներ։ Ինքնաթիռում զինամթերք չի եղել, իսկ վթարի պատճառների մասին դեռ վաղ է մեկնաբանություններ անել։ Պատճառը կպարզաբանվի վթարի հետաքննության ընթացքում։

Հարցին՝ կշարունակե՞ն, արդյոք, թռիչքները Թուրքիայի ՌՕՈՒ զինանոցում ներառված մյուս C-130 ինքնաթիռները, ՊՆ-ից նշել են, որ ինքնաթիռների թռիչքները կանխարգելիչ նպատակներով կասեցվել են 2025 թվականի նոյեմբերի 12-ից։ Թռիչքները  կվերսկսվեն մանրամասն տեխնիկական զննումների և ստուգումների ավարտից հետո։

Ադրբեջանական լրատվամիջոցներն էլ ավելի վաղ հայտնել էին, որ կործանված օդանավում եղել են մասնագետներ, որոնք սպասարկել են նոյեմբերի 8-ին Բաքվում անցկացված զինվորական շքերթին մասնակցած Թուրքիայի F-16 կործանիչները։ Նրանք ուղեկցել են բեռը՝ F-16-երի պահեստամասերը:

Թարգմանությունը՝ Էմմա Չոբանյանի