«Հեծանիվ վարելը ցավ է»․ այսօր հեծանվորդ է վրաերթի ենթարկվել

Այսօր՝ առավոտյան ժամը 10:15-ի սահմաններում, մայրաքաղաքում հեծանվորդ է վրաերթի ենթարկվել։ Ճանապարհատրանսպորտային պատահարը տեղի է ունեցել Արշակունյաց պողոտայի և Գարեգին Նժդեհի փողոցի խաչմերուկում։ Բարեբախտաբար, կյանքին վտանգ չի սպառնում։

Factor.am-ը պարզեց, որ քաղաքացին բուժօգնություն ստանալուց հետո դուրս է գրվել հիվանդանոցից։

Ինչպես հայտնի է, ՀՀ-ում ամենաբարձր՝ վարչապետի մակարդակով, խրախուսվում է հեծանիվ վարելը։ Նիկոլ Փաշինյանը բազմաթիվ անգամներ կոչ է արել աշխատանքի, դասի գալ-գնալ հեծանիվով, այդ թվում՝ Երևանին մոտ մարզերից։ Փաշինյանին հաճախ կարելի է տեսնել Երևանում հեծանիվ վարելիս․ վարչապետը երբեմն աշխատանքի է գնում հեծանիվով, երբեմն՝ հանդիպումների։

«Ինչո՞ւ ենք հեծանիվ քշում և դա ի ցույց դնում՝ քաջալերելու համար տեղաշարժվելու այլընտրանքային եղանակները»,- այս տարվա մարտի 12-ին «Ֆեյսբուք»-ում հարցը գրել ու պատասխանել էր Նիկոլ Փաշինյանը։

Փաշինյանը, թեև հորդորում է հաճախակի վարել հեծանիվ, բայց Երևանում և ՀՀ մյուս բոլոր բնակավայրերում առանձնացված հեծանվուղիներ չկան։ Չնայած այն հանգամանքին, որ Փաշինյանը հեծանիվ է վարել Լոնդոնում, Փարիզում, Մոսկվայում և այլ խոշոր քաղաքներում, որտեղ առկա են հեծանվուղիներ, չի անդրադառնում Երևանում հեծանվուղիներ չունենալու հարցին։

Ուշագրավ է, որ ՀՀ կառավարությունը Փաշինյանի կողմից հեծանվի հանդեպ ցուցաբերած հետաքրքրությունից հետո ուսանողների և դասախոսների համար հնարավորություններ է ստեղծում արտոնյալ պայմաններով հեծանիվ գնելու։ Նրանք կարող են մինչև 300 հազար դրամ արժեցող հեծանիվներ գնել վարկերով, կառավարությունը փոխհատուցում է վարկի տոկոսադրույքները։

Factor.am-ը պարբերաբար է հեծանվորդներից դժգոհություններ ստանում, որ Երևանում վտանագավոր է հեծանիվ վարելը և չեն տեսնում կառավարության կողմից խնդրի կարգավորման ջանքեր։

«Հեծանիվը ցավ է, որ պետք է հաղթահարես»,- մեկ այլ առիթով հայտարարել էր Նիկոլ Փաշինյանը։ Նրա այս փոխաբերական արտահայտությունը ուղիղ իմաստ է ստանում այսօր տեղի ունեցած վրաերթի դեպքի համատեքստում։

Նարեկ Կիրակոսյան