Քաղաքականություն
10.11.2025 | 15:43
Ադրբեջանը չի ծրագրում խաղաղապահներ ուղարկել Գազա, քանի դեռ Իսրայելի և ՀԱՄԱՍ-ի միջև մարտական գործողություններն այնտեղ լիովին չեն դադարեցվել։ Այս մասին Reuters-ին հայտնել է Ադրբեջանի կառավարության աղբյուրը։
ԱՄՆ նախագահ Դոնալդ Թրամփի Գազայի խաղաղության ծրագրի շրջանակում Վաշինգտոնը բանակցություններ է վարում Ադրբեջանի, Ինդոնեզիայի, ԱՄԷ-ի, Եգիպտոսի, Կատարի և Թուրքիայի հետ՝ մոտ 20,000 զինվորականից բաղկացած Միջազգային կայունացման ուժերի (ISF) կազմում այդ երկրների հնարավոր մասնակցության վերաբերյալ։
«Մենք չենք ուզում մեր զորքերը վտանգի ենթարկել։ Դա կարող է տեղի ունենալ միայն այն դեպքում, եթե ռազմական գործողությունները լիովին դադարեցվեն»,- ասել է ադրբեջանական աղբյուրը։
Նշվում է, որ նման ցանկացած որոշում պետք է հաստատվի խորհրդարանի կողմից։ Խորհրդարանական անվտանգության հանձնաժողովի ղեկավարը Reuters-ն ասել է, որ դեռևս որևէ օրինագիծ չի ստացվել այս հարցի վերաբերյալ։
ՄԱԿ-ում ԱՄՆ-ի կողմից մշակված բանաձևը կլիազորի ISF-ին «կիրառել բոլոր անհրաժեշտ միջոցները», անհրաժեշտության դեպքում՝ նաև ուժ՝ Գազայում անվտանգությունը կայունացնելու իր մանդատը կատարելու համար։
ՀԱՄԱՍ-ը չի հայտնել՝ արդյո՞ք կհամաձայնի զինաթափել և ապառազմականացնել Գազան, չնայած նախկինում մերժել է դա։
Ավելի վաղ ադրբեջանական իշխանական աղբյուրները հայտնել էին, որ Միացյալ Նահանգները դիմել է Ադրբեջանին՝ առաջարկելով միանալ Գազայի հատվածում կայունացման ուժերին։ Ըստ աղբյուրի՝ Բաքուն դեռևս վերջնական որոշում չի կայացրել։ Նշվում էր, որ Ադրբեջանի դիրքորոշումը հաստատուն է՝ ցանկացած մասնակցություն պետք է հիմնված լինի ՄԱԿ-ի Անվտանգության խորհրդի բանաձևի վրա, որը միջազգային լեգիտիմություն է շնորհում և հստակ մանդատ սահմանում։
Թարգմանությունը՝ Էմմա Չոբանյանի
