29.06.2026 | 11:15
Փոփոխություններ Արցախից տեղահանված ընտանիքների բնակապահովման պետական աջակցության ծրագրում. ՈՒՂԻՂ
Բաքուն դիտարկում է Գազայի կայունացման ուժերի առաքելությանը միանալու՝ ԱՄՆ-ի առաջարկը․ վերջնական որոշում չկա
Քաղաքականություն
30.10.2025 | 13:55
Ադրբեջանական իշխանական AnewZ-ի աղբյուրները հայտնել են, որ Միացյալ Նահանգները դիմել է Ադրբեջանին՝ առաջարկելով միանալ Գազայի հատվածում կայունացման ուժերին, որը միջազգային առաքելություն է՝ տարածքը անվտանգ պահելու համար, երբ մարտական գործողությունները դադարեն և մարդասիրական օգնությունը հասանելի դառնա։ Ըստ աղբյուրի՝ Բաքուն դեռևս վերջնական որոշում չի կայացրել։
Նշվում է, որ Ադրբեջանի դիրքորոշումը հաստատուն է՝ ցանկացած մասնակցություն պետք է հիմնված լինի ՄԱԿ-ի Անվտանգության խորհրդի բանաձևի վրա, որը միջազգային լեգիտիմություն է շնորհում և հստակ մանդատ սահմանում։
Այս առաքելությունը ՄԱԿ-ի դասական խաղաղապահ գործողություն չէ։ Այն պատկերացվում է որպես բազմազգ կայունացման ուժ՝ նման Բալկանյան հակամարտություններից հետո ստեղծված խաղաղաշինության շրջանակներին, նախատեսված կարևոր վայրերը պաշտպանելու, օգնության մատակարարումն ապահովելու և զինված բախման վերսկսումը կանխելու համար, մինչ քաղաքական կառույցների ձևավորումը։ Միջազգային կայունացման ուժերն ԱՄՆ-ի կողմից աջակցվող բազմազգ առաքելություն են։
Միացյալ Նահանգները չի պատրաստվում սեփական զորքերը տեղակայել Գազայում։ Փոխարենը Վաշինգտոնը ձգտում է ստեղծել հուսալի տարածաշրջանային և միջազգային գործընկերների կոալիցիա՝ Ադրբեջանին դիտարկելով որպես հուսալի գործընկեր, որը կարող է ապահովել ինչպես դիվանագիտական հավասարակշռություն, այնպես էլ փորձագիտություն ռազմավարական խաղաղապահ ջանքերում։ Իսրայելական լրատվամիջոցների հաղորդագրությունների համաձայն՝ հայեցակարգը վերջերս քննարկվել է ԱՄՆ փոխնախագահ Ջեյ Դի Վենսի և Իսրայելի վարչապետ Բենիամին Նեթանյահուի միջև։
Նշվում է, որ Ադրբեջանի մոտեցումը Գազայի հարցում մնացել է հետևողական։ Բաքուն համակարգում է իր գործողությունները Իսլամական համագործակցության կազմակերպության, Արաբական լիգայի և ավելի լայն իսլամական աշխարհի հետ՝ ընդգծելով, որ արաբական պետությունները նախ պետք է ստեղծեն միասնական տեսլական Գազայի ապագայի համար, նախքան արտաքին խաղացողների միջամտությունը։
Ավելի վաղ միջազգային լրատվամիջոցները հայտնել էին, որ Ադրբեջանը, Ինդոնեզիան և Պակիստանը բանակցում են Գազայի կայունացման ուժերի համար զորքեր տրամադրելու հարցով։
Թարգմանությունը՝ Էմմա Չոբանյանի
