06.04.2026 | 22:03
Թրամփը չի ստորագրել Իրանի հետ հրադադարի համաձայնագրի առաջարկի տակ. Սպիտակ տան պաշտոնյա
Ադրբեջանը, Ինդոնեզիան և Պակիստանը բանակցում են Գազայի կայունացման ուժերի համար զորքեր տրամադրելու հարցով․ Politico
Քաղաքականություն
16.10.2025 | 14:58
Ինդոնեզիան, Ադրբեջանը և Պակիստանը Գազայի հատվածում ապագա կայունացման ուժերի համար զորքեր մատակարարելու գլխավոր հավակնորդներն են։ Այս մասին Politico-ին ասել են ԱՄՆ պաշտպանության նախարարության պաշտոնյան և ԱՄՆ պաշտպանության նախկին պաշտոնյան։
ԱՄՆ պաշտպանության ներկայիս պաշտոնյան ասել է, որ ուժերի կազմի վերաբերյալ բանակցությունները շարունակվում են, և ոչ մի երկիր որևէ հստակ պարտավորություն չի ստանձնել։
Դրանք այն երկրներն են, որոնք ամենամեծ հետաքրքրությունն են հայտնել։Այս մասին ասել է ԱՄՆ պաշտպանության պաշտոնյան։ Թրամփի 20 կետից բաղկացած խաղաղության ծրագիրը Գազայում նախատեսում է, որ ԱՄՆ-ն կհամագործակցի արաբական և այլ գործընկերների հետ՝ ժամանակավոր կայունացման ուժեր տեղակայելու համար, որոնք կուսուցանեն և կաջակցեն ստուգված պաղեստինյան ոստիկանական ուժերին, և կխորհրդակցեն Եգիպտոսի և Հորդանանի հետ այդ ջանքերի վերաբերյալ։ ԱՄՆ-ն հայտարարել է, որ ոչ մի ամերիկյան զորք չի լինի Գազայի ներսում։
Այսպես կոչված միջազգային կայունացման ուժերը կարևոր բաղադրիչ են Թրամփի՝ ՀԱՄԱՍ-ի և Իսրայելի միջև պատերազմը դադարեցնելու և Գազայի վերջնական ապառազմականացման ու վերակառուցման համար ճանապարհ հարթելու ծրագրի համար։
Նման ուժերի տեղակայումը կտևի առնվազն մի քանի ամիս։ Շատ դիվանագետներ և վերլուծաբաններ կասկածում են, որ Թրամփի ծրագիրը երբևէ կանցնի իր ներկայիս փուլից այն կողմ, որը նախատեսում է հրադադար՝ Իսրայելում մնացած բոլոր պատանդների ազատ արձակման դիմաց։
«Կանցնի երկու-երեք ամիս այն պահից, երբ որոշում կկայացվի» այն մասին, թե ով կմասնակցի։Այս մասին Դեն Շապիրոն, որը Բայդենի վարչակազմի օրոք եղել է Պենտագոնի Մերձավոր Արևելքի գծով բարձրաստիճան պաշտոնյան։
Սպիտակ տունը և Ինդոնեզիայի, Պակիստանի և Ադրբեջանի դեսպանատները դեռևս չեն արձագանքել լրատվամիջոցի մեկնաբանության խնդրանքներին։
ԱՄՆ-ն 200 զինվոր է ուղարկել Իսրայել՝ հրադադարի պահպանման և անկլավի կայունացման ջանքերը համակարգելու համար: ԱՄՆ Կենտրոնական հրամանատարության ներքո գտնվող զորքերը կտեղակայվեն Իսրայելի Գազայի հյուսիսում գտնվող քաղաքացիական-ռազմական համակարգման կենտրոնում: Եգիպտոսի, Կատարի և Էմիրաթի զորքերը նույնպես նախատեսվում է տեղակայել համակարգման կենտրոնում: Եգիպտական ուժերը ներկայումս օգնում են Գազայում մահացած պատանդների մարմինները դուրս բերելուն։
Պաշտպանության նախկին պաշտոնյան ասել է, որ Ինդոնեզիայի և Ադրբեջանի հետ համակարգումը ավելի կբարդացնի կայունացման ջանքերը, քանի որ դրանք չեն գտնվում CENTCOM-ի պատասխանատվության գոտում։
Հարցին՝ ինչպե՞ս են զարգանում ծրագրերը, Պենտագոնը հղում է արել CENTCOM-ին, իսկ հրամանատարության խոսնակը հրաժարվել է մեկնաբանություն տալ։
Փոխանցման այլ ասպեկտները նույնպես դեռևս որոշված չեն։ Թրամփի վարչակազմը դեռևս չի հայտարարել Պետդեպարտամենտի կամ ԱՄՆ այլ գործակալությունների շրջանակներում որևէ այլ տեխնիկական խմբի կամ համակարգող մարմնի ստեղծման մասին, որը կարող է ապահովել այս նախագծի իրականացումը։
ԱՄՆ-ն և նրա դաշնակիցները այժմ փորձում են իրականացնել պլանի հաջորդ փուլը՝ համոզել ՀԱՄԱՍ-ին հրաժարվել զենքից։
«Բոլորն ասում են. «Օ՜, լավ, նրանք չեն զինաթափվի»։ Նրանք կզինաթափվեն։ Ես խոսեցի ՀԱՄԱՍ-ի հետ և ասացի. «Դուք զինաթափվելու եք, չէ՞»։ «Այո, պարոն, մենք զինաթափվելու ենք»։ Ահա թե ինչ ասացին նրանք ինձ։ Նրանք կզինաթափվեն, կամ մենք կզինաթափենք նրանց։ Հասկացա՞ք»,- Սպիտակ տանը Արգենտինայի նախագահի հետ կայացած միջոցառման ժամանակ ասել էր նախագահ Դոնալդ Թրամփը։
Թարգմանությունը՝ Էմմա Չոբանյանի
