24.05.2026 | 01:30
«SOAD-ը Երևանու՞մ». Սերժ Թանկյանը հայտարարել է՝ հուլիսին համերգ չի լինի
ԵՊՀ-ում արաբական մշակույթի կենտրոն է բացվել
Մշակույթ
30.10.2018 | 16:29
ԵՊՀ արևելագիտության ֆակուլտետում տեղի ունեցավ Աբդուլազիզ Սաուդ ալ-Բաբտեյնի անվան արաբական մշակույթի կենտրոնի բացման արարողությունը:
Կենտրոնի բացմանը ներկա էին ԵՊՀ ղեկավարությունը, ՀՀ-ում հավատարմագրված արաբական երկրների դեսպանները, ինչպես նաև արաբական երկրներում ՀՀ արտակարգ ու լիազոր դեսպանները:
Բացման խոսքով հանդես եկավ Արաբագիտության ամբիոնի վարիչ Հայկ Քոչարյանը: Վերջինս շեշտեց, որ շատ բարձր է գնահատում արաբական երկրների հետ ունեցած գիտական և մշակութային հարաբերությունները:
«Այս կենտրոնի բացումն ապացուցում է, որ մենք հնարավոր ամեն ինչ անում ենք՝ արաբական երկրների հետ համագործակցության նոր ծրագրեր իրականացնելու համար: Կենտրոնի հիմնական առաքելություններից մեկը գիտահետազոտական գործունեություն իրականացնելն է, որը հնարավորություն կտա առաջին հերթին մեր ուսանողներին առավել որակյալ գիտելիքներ ձեռք բերելու արաբագիտության ոլորտում»,- ասաց Հայկ Քոչարյանը:
ԵՊՀ ուսումնական աշխատանքների գծով պրոռեկտոր Ալեքսանդր Գրիգորյանը նշեց, որ Աբդուլազիզ Սաուդ ալ-Բաբտեյնի անվան արաբական մշակույթի կենտրոնի բացումն ամենալավ նվերն էր Արևելագիտության ֆակուլտետի 50-ամյակին:
Արևելագիտության ֆակուլտետի դեկան Ռուբեն Մելքոնյանը հույս հայտնեց, որ կենտրոնը մի նոր քայլ է լինելու արաբական երկրների հետ գիտահետազոտական հարթակում համագործակցելու համար. «Վստահաբար, մենք ունենալու ենք նոր գիտահետազոտական կենտրոն, որը մեր շրջանավարտներին հնարավորություն կտա էլ ավելի մրցունակ լինելու և իրենց լուման ներդնելու արաբական երկրների հետ համագործակցության զարգացման գործում»:
Արաբական մշակույթի կենտրոնը հովանավորվում է «Աբդուլազիզ Սաուդ ալ-Բաբտեյն մշակութային» հիմնադրամի կողմից, որը հիմնադրել է քուվեյթցի բանաստեղծ Աբդուլազիզ Սաուդ ալ-Բաբտեյնը 1989 թվականին Եգիպտոսում:
Հիմնադրամի ջանքերով աշխարհի տարբեր համալսարաններում ստեղծվում են արաբական մշակույթի կենտրոններ, որոնց նպատակն է աշխարհի տարբեր ծայրերում ներկայացնել և ճանաչելի դարձնել արաբական մշակույթը:
ԵՊՀ-ն և «Աբդուլազիզ Սաուդ ալ-Բաբտեյն մշակութային» հիմնադրամը նախորդ տարի հուշագիր են ստորագրել, ըստ որի՝ իրականացվելու են արաբական մշակույթին վերաբերող գիտահետազոտական տարաբնույթ ծրագրեր։
Այս տարի ԵՊՀ արևելագիտության ֆակուլտետն ընդլայնում է գիտահետազոտական ծրագրերը՝ ներառելով նաև նոր դասագրքերի ստեղծում և արաբական ֆիլմերի սուբտիտրային թարգմանություն:
