24.06.2026 | 07:58
ԱԱ-2026. Կոլումբիան հաղթեց ու նվաճեց փլեյ-օֆֆի ուղեգիր. ՏԵՍԱՆՅՈՒԹ
3-ամյա Տիգրանին դեռ չի հաջողվել գտնել․ որոնողական աշխատանքները շարունակվում են
Հասարակություն
29.10.2025 | 10:48
Ծափաթաղում փրկարարներն ու բնակիչները շարունակում են փնտրել 3-ամյա Տիգրան Օվանեսովին։ ՆԳ նախարարության մամուլի քարտուղար Նարեկ Սարգսյանը Factor.am-ի հետ զրույցում ասաց, որ ողջ գիշեր որոնողական աշխատանքներ են ընթացել, այժմ էլ ինտենսիվ շարունակվում են։
Հիշեցնենք, որ հոկտեմբերի 27-ին` ժամը 18։00-ի սահմաններում, ոստիկանություն հաղորդում է ստացվել, որ Գեղարքունիքի մարզի Ծափաթաղ գյուղի բնակիչ, 2022 թվականին ծնված Տիգրան Օվանեսովը ժամը 16.30-ի սահմաններում կորել է։
Տիգրանի ազգականները Factor TV-ի հետ զրույցում երեկ կարծիք էին հայտնում, որ երեխան կա՛մ մոլորվել է, կա՛մ գողացել են։ ՆԳ նախարարի մամուլի քարտուղարն ասաց, որ քննարկում են մի քանի վարկածներ, բայց առանց մանրամասնելու։
Ըստ գյուղացիների և ազգականների՝ Տիգրանի անհետանալու օրը նրան տեսել են կամրջի տարածքում, բայց այդ հատվածում որոնողական աշխատանքների արդյունքում ոչինչ չի հայտնաբերվել, միայն հագուստի կտորներ, որոնք, սակայն, 3-ամյա տղային չեն պատկանում։ Այս մասին երեկ մեր հարցին ի պատասխան հայտնեց ՆԳՆ ՓԾ տնօրեն Կամո Ցուցուլյանը։
Ի դեպ, Տիգրանն այդ օրը եղբոր հետ է եղել, որը երեկ փրկարարներին տանում էր դեպի կամուրջ՝ ցույց տալով տեղանքը, որտեղ խաղացել են։ Երեխան խոսքի խնդիր ունի, այդ պատճառով նրան երեկ ոստիկաններն ուղեկցել էին լոգոպեդի մոտ, բայց կրկին չի հաջողվել որևէ բան պարզել։
ՆԳՆ Ոստիկանության տարածած հաղորդագրությունում էլ ասվում է, որ ժամը 10:00-ի դրությամբ աշխատանքներին ներգրավված են ՆԳՆ Ոստիկանության 100 և Փրկարար ծառայության 212 ծառայող։ Աշխատանքներն իրականացվում են 7 ուղղությունով, օգտագործվում են 6 ամենագնաց և տեխնիկական այլ միջոցներ։
Որոնումներին մասնակցում են նաև Ծափաթաղ գյուղի, մերձակա բնակավայրերի բնակիչներ և մարզի տարբեր բնակավայրերից կամավորներ։
«ՆԳՆ Ոստիկանությունը կոչ է անում զերծ մնալ չճշտված տեղեկություններ տարածելուց, հետևել միայն պաշտոնական տեղեկատվությանը։
Անհրաժեշտության դեպքում կտրվի լրացուցիչ իրազեկում»,- ասված է հաղորդագրությունում։
Արփի Հակոբյան
