16.02.2026 | 20:00
ՔՆՆԱՐԿՈՒՄ․ Փոշի, ծուխ, ծառահատում․ ո՞վ է պատասխանատու Երևանի ծանր շնչառության համար
Բաքվում կայանալիք Եվրոպական ռաբբիների համաժողովը չեղարկվել է՝ անվտանգության նկատառումներից ելնելով
Քաղաքականություն
27.10.2025 | 22:13
Եվրոպական ռաբբիների համաժողովն անվտանգության նկատառումներից ելնելով չեղարկել է առաջիկա համաժողովը, որը պետք է տեղի ունենար հաջորդ ամսվա սկզբին Ադրբեջանի մայրաքաղաք Բաքվում, գրում է իսրայելական Ynet-ը։
Նշվում է, որ նոյեմբերի 3-6-ը նախատեսված հավաքին, ենթադրվում էր, պետք է ներկա լիներ շուրջ 600 մասնակից, այդ թվում՝ ռաբբիներ, կրոնական առաջնորդներ, քաղաքական և հասարակական գործիչներ Եվրոպայից, Իսրայելից, Միացյալ Նահանգներից և այլ երկրներից։ Սպասվում էր նաև գլխավոր ռաբբիներ Դավիթ Յոսեֆի և Կալման Բերի մասնակցությունը։
Բացի այդ, կազմակերպիչներն արդեն զգալի ֆինանսական միջոցներ էին ներդրել նախապատրաստական աշխատանքների համար։
Այս տարեսկզբին հրապարակված հայտարարության մեջ Եվրոպական ռաբբիների համաժողովը նշել էր, որ միջոցառումը պետք է լինի իր տեսակի մեջ առաջինը՝ եվրոպական ռաբբիական առաջնորդների լայնածավալ հանդիպում գերազանցապես մահմեդական երկրում։
Կազմակերպությունն այն նկարագրել էր որպես «կենդանի օրինակ, որ նույնիսկ ճգնաժամերի, հակամարտության և ապատեղեկատվության ժամանակներում հնարավոր է համագործակցություն, փոխադարձ հարգանք և համատեղ նվիրվածություն կրոնական և մշակութային սահմաններից այն կողմ»։
Հավելենք, որ համաժողովը Բաքվում անցկացնելու ծրագիրը դժգոհություն էր առաջացրել Թուրքիայում։ Մասնավորապես, օրերս Թուրքիայի «Հայրենիք» կուսակցության նախագահ Դողու Փերինչեքը դիմել էր Ադրբեջանի նախագահ Իլհամ Ալիևին՝ դժգոհություն հայտնելով նոյեմբերի 4-ից 6-ը Բաքվում նախատեսված Եվրոպական ռաբբիների համաժողովի անցկացման կապակցությամբ և կոչ արել չեղարկել այն։
Թարգմանությունը՝ Էմմա Չոբանյանի
