Շիրակի մարզում կարկուտից տուժած 3 համայնք կստանա դրամական աջակցություն

Հայկական Կարմիր խաչի ընկերության կողմից Շիրակի մարզում կարկուտից տուժած 3 համայնք՝ Առափին, Սառնաղբյուրը և Նահապետավանը, կստանան դրամական աջակցություն: Սրանք այս տարի կարկտահարությունից ամենաշատ տուժած համայնքներն են:

Այս մասին «Արմենպրես»-ին տեղեկացրեց Հայկական Կարմիր խաչի ընկերության Շիրակի մասնաճյուղի գործադիր տնօրեն Սամվել Մադոյանը: «Այս համայնքների բոլոր բնակիչները կստանան դրամական աջակցություն՝ յուրաքանչյուրը 50 շվեյցարական ֆրանկին համարժեք ՀՀ դրամի չափով: Հայկական Կարմիր խաչի ընկերությունը, տվյալ համայնքներին աջակցելու նպատակով, դիմել էր Աղետների արձագանքման ֆեդերացիայի ֆոնդին և ստացել դրական պատասխան: Գումարը կտրամադրվի բանկի միջոցով»:

Ինչպես տեղեկացնում է «Արմենպրես»-ը սա Հայկական Կարմիր խաչի ընկերության միակ ծրագիրը չէ որ այս պահին իրականացվում է Շիրակում. Շիրակի մարզում կազմակերպությունը բազմաբնույթ ծրագրեր է իրականացնում՝ տարբեր ուղղություններով: Մասնաճյուղի գործադիր տնօրեն Սամվել Մադոյանը, «Արմենպրես»-ին ներկայացնելով դրանք, առանձնացրեց «Համայնքային ինտեգրացված տնային խնամք և առողջ ծերացում» ծրագիրը, որը ուղղված է տարեցների, հաշմանդամություն կամ քրոնիկ հիվանդություն ունեցող անձանց համար սոցիալ – առողջապահական տնային խնամքի մոդելի ներդրմանը, ինչպես նաև համայնքներում ակտիվ ծերացման քարոզչությանը: Այս ծրագիր ընդգրկված է 60 շահառու: «Ծրագրի առաջին բաղադրիչը՝ Համայնքային ինտեգրացված տնային խնամք այս պահին իրականացվում է միայն Գյումրի քաղաքում:

Ծրագիր ընդգրկված շահառուները ստանում են բուժական օգնություն և տնային խնամք»,-նշեց պատասխանատուն հավելելով, որ եթե այս շահառուները սպասարկվում են անվճար, ապա նպատակ կա առաջիկայում ծրագիրն ընդգրկել նաև այն շահառուներին, ովքեր պատրաստ են ծառայության դիմաց վճարել:

Ծրագրի երկրորդ բաղադրիչը՝ առողջ ծերացում՝ իրականացվում է մարզի 5 համայնքում՝ Ամասիա, Սպանդարյան, Արթիկ, Փանիկ, Նոր Կյանք և Հոռոմ: Բոլոր համայնքներում արդեն կան նախաձեռնող խմբեր: Կազմակերպությունը Շիրակում իրականացնում է նաև «Անհետ կորածների ընտանիքների սատարում», «Աղետների կառավարում» և այլ ծրագրեր