19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
Պուտինը հաստատել է մինչև 2030 թվականի ՌԴ միգրացիոն քաղաքականության հայեցակարգը․ ինչ է այն ներառում
Քաղաքականություն
16.10.2025 | 19:28
ՌԴ նախագահ Վլադիմիր Պուտինը ստորագրել է հրամանագիր, որով հաստատվել է Ռուսաստանի 2026-2030 թվականների պետական միգրացիոն քաղաքականության հայեցակարգը։ Փաստաթուղթը հրապարակվել է իրավական ակտերի պորտալում, գրում է Meduza-ն։
Հայեցակարգը գնահատում է դեպի Ռուսաստան միգրացիայի 2019-2025 թվականների արդյունքները, նաև սահմանում հաջորդ չորս տարվա նպատակները։ Գնահատման հատվածում նշվում է, որ նախորդ տարիներին աճել է աշխատանքի եկող օտարերկրացիների թիվը, այդ թվում՝ այն երկրներից, որոնց հետ Ռուսաստանն ունի վիզային ռեժիմ, և այս միտումը կշարունակվի մինչև 2030 թվականը։
Բացի այդ, հայեցակարգում նշվում է, որ «ռուսական ավանդական հոգևոր և բարոյական արժեքների պահպանման ու ամրապնդման» պետական քաղաքականությունը դարձել է Ռուսաստան վերաբնակեցման էական գործոն։ Սակայն, հաշվի առնելով «ազգային անվտանգությանը նոր մարտահրավերների և սպառնալիքների» ի հայտ գալը, փաստաթղթում նշվում է, որ Ռուսաստանի միգրացիոն քաղաքականությունը պետք է բարելավվի։ Սա ներառում է նոր ժամանողների նկատմամբ վերահսկողության խստացում՝ թվային ծառայությունների, կենսաչափական տվյալների, վերահսկվող անձանց գրանցամատյանի և այլ վերահսկողության միջոցառումների միջոցով։
Միաժամանակ, անհրաժեշտ է ստեղծել «բարենպաստ ռեժիմ» «այն անհատների (ներառյալ՝ այն լքածների) Ռուսաստանում կամավոր վերաբնակեցման համար, որոնք ունակ են օրգանապես ինտեգրվել դրական սոցիալական կապերի համակարգում» (հայեցակարգը չի պարզաբանում, թե ինչ է նշանակում նման «ներառումը»)։
Փաստաթղթում առաջարկվում է աջակցել «ավանդական արժեքներ» կիսող օտարերկրացիների վերաբնակեցմանը Ռուսաստան։ Այն նաև նախատեսում է պատերազմի պատճառով փախած Ուկրաինայի բռնակցված մասերի բնակիչներին վերադարձնել (ներառյալ արտասահմանից)։ Սա ներառված է հայեցակարգի իրականացման հիմնական ուղղությունների շարքում։
Մինչև 2030 թվականը միգրացիոն քաղաքականության արդյունքները, ի թիվս այլ բաների, պետք է ներառեն Ռուսաստանում անօրինական կերպով գտնվողների թվի կրճատումը, ժամանողների շրջանում հանցագործության մակարդակի նվազումը և «հոգևոր և բարոյական արժեքների» հիման վրա տեղափոխված օտարերկրացիների թվի աճը։
Թարգմանությունը՝ Էմմա Չոբանյանի
