07.09.2026 | 14:14
«Էմիլի ֆարմ»-ի 7 մասնաճյուղում 9 վարչական խախտում է արձանագրվել
Հիմա ընկերներ են․ Թրամփը Խաղաղության գագաթնաժողովում Հայաստանի ու Ադրբեջանի միջև կարգավորումից է խոսել
Քաղաքականություն
13.10.2025 | 23:00
ԱՄՆ նախագահ Դոնալդ Թրամփը Եգիպտոսում Խաղաղության գագաթնաժողովի շրջանակներում կրկին խոսել է հայ-ադրբեջանական կարգավորման գործընթացում իր դերակատարումից՝ դիմելով ՀՀ վարչապետ Նիկոլ Փաշինյանին ու Ադրբեջանի նախագահ Իլհամ Ալիևին։
«Այստեղ մենք ունենք Հայաստանն ու Ադրբեջանը։ Նայեք, նրանք նստած են այստեղ։ Երբ ես առաջին անգամ հանդիպեցի նրանց Օվալաձև աշխատասենյակում, նրանք նստած էին հակառակ կողմերում, իսկ մեկ ժամ անց նրանք գրկախառնվում էին։ Հիմա նրանք նստած են միասին՝ որպես ընկերներ, նայեք նրանց։ Ես ուզում եմ շնորհակալություն հայտնել ձեզ երկուսիդ էլ։ Դա անհավանական է», – ասել է Թրամփը։
ԱՄՆ նախագահը Հայաստանին ու Ադրբեջանին անդրադարձել էր նաև հենց գագաթնաժողովի ընթացքում։
«Հիմա դուք լավ հարաբերությունների մեջ եք, այնպես չէ՞։ 32 տարվա կռիվ էր, բայց մենք այն լուծեցինք մոտ մեկ ժամվա ընթացքում, այնպես չէ՞։ Նրանք հիմա լավ հարաբերությունների մեջ են։ Շնորհակալություն բոլորիդ այստեղ գտնվելու համար»,- ասել էր Թրամփը՝ դիմելով Փաշինյանին ու Ալիևին։
Հավելենք, որ գագաթնաժողովում ԱՄՆ-ի, Եգիպտոսի, Կատարի և Թուրքիայի ղեկավարները ստորագրել էին հրադադարի հռչակագիրը, որպես երկամյա պատերազմի ավարտին ուղղված Գազայի համաձայնագրի երաշխավորներ։
Թարգմանությունը՝ Էմմա Չոբանյանի
