21.02.2026 | 13:45
Ֆինն Գերագուսյանը` հաղթական գոլի հեղինակ․ ՏԵՍԱՆՅՈՒԹ
Զելենսկին Զապորոժիեի ատոմակայանում ստեղծված իրավիճակը կրիտիկական է անվանել
Քաղաքականություն
01.10.2025 | 12:21
Ուկրաինայի նախագահ Վլադիմիր Զելենսկին հայտարարել է, որ Զապորոժիեի ատոմակայանը մեկ շաբաթ է՝ առանց արտաքին էներգամատակարարման է մնացել՝ առաջին անգամ ռուսական օկուպացիայից ի վեր, փոխանցում է BBC-ի ռուսական ծառայությունը։
«Իրավիճակը կրիտիկական է։ Ռուսական հարվածների պատճառով կայանն անջատված է էլեկտրացանցից։ Այն ապահովում է էլեկտրականությամբ դիզելային գեներատորներով։ Սա արտակարգ իրավիճակ է։ Գեներատորներն ու կայանը նախատեսված չեն դրա համար և երբեք այդքան երկար չեն աշխատել այս ռեժիմով։ Մենք տեղեկություններ ունենք, որ գեներատորներից մեկը խափանվել է։ Հենց ռուսներն են, կրակոցների պատճառով, որ խոչընդոտում են կայան տանող էլեկտրահաղորդման գծերի վերանորոգմանը և տարրական անվտանգության վերականգնմանը»,- գրել է նա տելեգրամի իր ալիքում։
Նա հավելել է, որ խորհրդակցություն է անցկացրել զինվորական անձնակազմի և Էներգետիկայի նախարարության ներկայացուցիչների հետ և հանձնարարել միջազգային հանրության ուշադրությունը հրավիրել այս իրավիճակի վրա։
Ավելի վաղ Զելենսկին հայտնել էր, որ Զապորոժիեի ԱԷԿ-ում ստեղծված իրավիճակը քննարկել է ՄԱԿ-ի գլխավոր քարտուղար Անտոնիո Գուտերեշի հետ։
«Կարևոր է, որ աշխարհն իմանա, թե ինչ հետևանքներ կարող են լինել։ Մենք սպասում ենք համապատասխան արձագանքի»,- ասել է Ուկրաինայի նախագահը։
Ատոմային էներգիայի միջազգային գործակալությունը (ՄԱԳԱՏԷ) նույնպես նախօրեին մեկնաբանել է Զապորոժիեի ատոմակայանում ստեղծված իրավիճակը։ Գործակալությունը կարծում է, որ արտակարգ դիզելային գեներատորները ներկայում աշխատում են պատշաճ կերպով և ունեն վառելիքի բավարար պաշարներ, սակայն անհրաժեշտ է հնարավորինս շուտ վերականգնել կայանի արտաքին էլեկտրամատակարարումը։
«Ռեակտորային բլոկների և մշակված վառելիքի վիճակը կայուն է այնքան ժամանակ, քանի դեռ դիզելային գեներատորները կարող են ապահովել բավարար հզորություն՝ անհրաժեշտ անվտանգության և սառեցման գործառույթներն ապահովելու համար: Այնուամենայնիվ, կարևոր է վերականգնել արտաքին էլեկտրամատակարարումը: Ես կոչ եմ անում երկու կողմերին էլ համագործակցել և իրականացնել վերանորոգումներ»,- ասել է ՄԱԳԱՏԷ-ի ղեկավար Ռաֆայել Գրոսսին:
Զապորոժիեի ատոմակայանը Եվրոպայում ամենամեծն է։ Ռուսական ուժերն այն գրավել են 2022 թվականի մարտի 4-ին։ 2022 թվականի սեպտեմբերից ի վեր կայանը էլեկտրաէներգիա չի արտադրում. գործում են միայն ռեակտորները սառեցնելու համար անհրաժեշտ համակարգերը։
Թարգմանությունը՝ Էմմա Չոբանյանի
