07.12.2025 | 13:04
Պյոտր Յանը հասել է ռևանշի ու վերադարձրել UFC-ի չեմպիոնի տիտղոսը․ ՏԵՍԱՆՅՈՒԹ
YouTube-ը 24.5 միլիոն դոլար կվճարի Թրամփին նրա օգտահաշիվն արգելափակելու գործով
Քաղաքականություն
30.09.2025 | 15:51
YouTube-ը համաձայնել է վճարել 24.5 միլիոն դոլար դատական հայցի շրջանակում, որը վերաբերում է ԱՄՆ նախագահ Դոնալդ Թրամփի հաշվի արգելափակմանը 2021 թվականի հունվարի 6-ին ԱՄՆ Կապիտոլիումի անկարգություններից հետո, գրում է CNBC-ն։
Կալիֆոռնիայի Հյուսիսային շրջանի ԱՄՆ շրջանային դատարանի կողմից ներկայացված դիմումի մեջ նշվում է, որ համաձայնագիրը «չի կարող համարվել պատասխանատվության կամ մեղքի ընդունում» պատասխանողների կամ դրանց հետ կապված կողմերի անունից։
Թրամփը դատի էր տվել YouTube-ին, Facebook-ին և Twitter-ին 2021 թվականի կեսերին, այն բանից հետո, երբ ընկերությունները կասեցրել էին նրա օգտահաշիվները իրենց հարթակներում՝ բռնության հրահրման հետ կապված մտահոգությունների պատճառով։
Նոյեմբերին Թրամփի երկրորդ ժամկետը ստանձնելուց և հունվարին Սպիտակ տուն վերադառնալուց ի վեր, տեխնոլոգիական ընկերությունները կարգավորում են իրենց վեճերը ԱՄՆ նախագահի հետ: Facebook-ի մայր Meta ընկերությունը հունվարին հայտարարել էր, որ կվճարի 25 միլիոն դոլար՝ Թրամփի հետ իր դատական հայցը կարգավորելու համար: Հաջորդ ամիս Իլոն Մասկի X-ը, նախկինում Twitter-ը, համաձայնել էր կարգավորել Թրամփի հետ կապված իր գործը մոտավորապես 10 միլիոն դոլարով:
Օգոստոսին մի քանի դեմոկրատ սենատորներ, այդ թվում՝ Մասաչուսեթսից Էլիզաբեթ Ուորենը, նամակ էին ուղարկել Google-ի գործադիր տնօրեն Սունդար Պիչային և YouTube-ի գործադիր տնօրեն Նիլ Մոհանին՝ արտահայտելով իրենց մտահոգությունը նախագահի հետ հնարավոր համաձայնագրի վերաբերյալ։
Նամակում սենատորները նշել են, որ մտահոգված են, որ նման գործողությունը կլինի «փոխադարձ համաձայնության» մի մաս՝ խուսափելու դաշնային մրցակցության, սպառողների պաշտպանության և աշխատանքային օրենքների խախտման համար լիակատար պատասխանատվությունից, հանգամանքներ, որոնք կարող են հանգեցնել ընկերության կողմից դաշնային կաշառակերության օրենքների խախտմանը։
Թարգմանությունը՝ Էմմա Չոբանյանի
