20.08.2026 | 11:31
Կոնջորյանն` ընդդիմադիրներին հանձնաժողովի նախագահ ընտրելու մասին․ ՏԵՍԱՆՅՈՒԹ
ԱՄՆ-ը թույլատրել է Ուկրաինային հարվածներ հասցնել Ռուսաստանի տարածքի խորքային թիրախներին․ Թրամփի հատուկ բանագնաց
Քաղաքականություն
29.09.2025 | 11:01
ԱՄՆ-ը թույլատրել է Ուկրաինային հարվածներ հասցնել Ռուսաստանի տարածքի խորքին։ Այս մասին Fox News-ին տված հարցազրույցում հայտարարել է ԱՄՆ նախագահ Դոնալդ Թրամփի հատուկ բանագնաց Քիթ Քելլոգը, փոխանցում է Current time-ը։
Լրագրող Ջեքի Հենրիխի հարցին՝ արդյո՞ք Թրամփի դիրքորոշումն այն է, որ «Ուկրաինան կարող է հեռահար հարվածներ հասցնել Ռուսաստանին, և որ դա թույլատրվել է նախագահի կողմից», Քելլոգը պատասխանել է, որ դատելով Թրամփի, փոխնախագահ Ջեյ Դի Վենսի և պետքարտուղար Մարկո Ռուբիոյի հայտարարություններից՝ «այո»։
«Օգտագործեք հնարավորությունը՝ խորը հարված հասցնելու համար։ Անվտանգ գոտիներ չկան»,- հավելել է նա։
ԱՄՆ նախագահի հատուկ ներկայացուցիչը նաև հիշեցրել է, որ Ուկրաինայի նախագահ Վլադիմիր Զելենսկին Թրամփի հետ հանդիպման ժամանակ խնդրել է հեռահար Tomahawk թևավոր հրթիռներ, սակայն դրանց վերաբերյալ որոշում դեռևս չի կայացվել։
2025 թվականի հուլիսի կեսերին The Washington Post-ը հաղորդել էր, որ Թրամփը զրույցի ժամանակ Զելենսկիին հարցրել է, թե ինչու Կիևը չի հարվածում Մոսկվային։ Հրապարակման համաձայն՝ Զելենսկին պատասխանել է, որ Ուկրաինան կարող է դա անել, եթե ԱՄՆ-ը զենք տրամադրի։ Թրամփը նշել էր, որ Ուկրաինան պետք է ճնշում գործադրի ՌԴ նախագահ Վլադիմիր Պուտինի վրա և հարվածի ոչ միայն Մոսկվային, այլև Սանկտ Պետերբուրգին։
2024 թվականի նոյեմբերին ԵՄ դիվանագիտության այն ժամանակվա ղեկավար Ժոզեպ Բորելը հայտարարել էր, որ Միացյալ Նահանգները թույլատրել է Կիևին օգտագործել մինչև 300 կիլոմետր հեռահարության ամերիկյան հրթիռներ՝ Ռուսաստանի խորքում հարվածներ հասցնելու համար: Լրատվամիջոցները գրել էին, որ դա վերաբերում է Ուկրաինայի տրամադրության տակ գտնվող ATACMS հրթիռներին: ԱՄՆ այն ժամանակվա նախագահ Ջո Բայդենը թույլատրել էր դրանց օգտագործումը Ռուսաստանի Կուրսկի շրջանում գործողությանը մասնակցող Ուկրաինայի զինված ուժերի ստորաբաժանումները պաշտպանելու համար:
Թարգմանությունը՝ Էմմա Չոբանյանի
