Մերձավանի սպանությունների դեպքով երկրորդ անձն է ձերբակալվել. նա խոստովանական ցուցմունք է տվել

Ներքին գործերի նախարարի մամուլի քարտուղար Նարեկ Սարգսյանը հայտարարություն է տարածել, որում նշվում է․

«ՆԳՆ Քրեական ոստիկանության ծառայողները ոստիկանության մյուս ստորաբաժանումների աշխատակիցների հետ ձեռնարկած համագործակցված լայնածավալ օպերատիվ-հետախուզական միջոցառումների շնորհիվ հայտնաբերել և Համայնքային ոստիկանության Վաղարշապատի բաժին են ներկայացրել մեկ անձի, ով խոստովանել է, որ Մերձավանում ինքն է կրակոցներ արձակել 3 անձանց ուղղությամբ, ինչի հետևանքով 2-ը մահացել էին, իսկ 1-ը ստացել էր հրազենային վնասվածք:

Հանցագործության գործիք հանդիսացող հրազենը հայտնաբերվել է:

Կտրվի լրացուցիչ տեղեկատվություն»,-նշել է նա:

Ավելի վաղ Factor TV-ն հայտնել էր՝ իրավապահները նոր տվյալներ են ստացել Մերձավանում տեղի ունեցած սպանության դեպքի վերաբերյալ։ Մեր տեղեկությունների համաձայն՝ ոստիկաններն իրենց տրամադրության տակ տեսագրություն ունեն, որում երևում է, թե ինչպես է սպանությունը կատարած անձը դեպքից հետո վազում  դեպքի վայրի հարակից տարածքում։

Նշենք, որ սպանության հաջորդ օրը տեսանյութ տարածվեց, որտեղ երևում է՝ դիմակավորված անձը կրակահերթ է բացում Փարաքարի համայնքապետ Վալոդյա Գրիգորյանի ու ևս երկու անձի ուղղությամբ, երբ նրանք բակից դուրս են գալիս փողոց։ Դեպքի վայրից հայտնաբերվել և առգրավվել է 18 կրակված պարկուճ։

Հիշեցնենք, որ այս գործով մեկ ձերբակալված կա։ Նա փետրվարի 5-ին Մերձավանում սպանված Գրիգոր Օհանյանի եղբայրն է՝ Նարեկ Օհանյանը։ Քննչական կոմիտեն հայտնել է, որ Օհանյանին պատկանող շինությունում հայտնաբերվել են հանցագործության կատարման պահին օգտագործված դիմակ, ձեռնոցներ, կոշիկներ, բաճկոն և գիշերային տեսանելիության սարք։ Ըստ իրավապահների՝ ձերբակալվածը փորձել է դրանք այրել՝ հետքերը ոչնչացնելու նպատակով։