Թրամփը դեղերի, բեռնատարների և կահույքի ներմուծման նոր մաքսատուրքեր է սահմանում

ԱՄՆ նախագահ Դոնալդ Թրամփը հայտարարել է ներմուծվող դեղագործական ապրանքների, բեռնատարների և կահույքի նոր մաքսատուրքերի սահմանման մասին: Հոկտեմբերի 1-ից սկսած՝ բոլոր ապրանքանիշային և արտոնագրված դեղամիջոցների համար կկիրառվի 100% մաքսատուրք, եթե ընկերություններն արտադրական օբյեկտներ չկառուցեն ԱՄՆ-ում։ Այս մասին հայտարարել է Թրափը Truth Social սոցցանցում գրառմամբ, փոխանցում է DW-ի ռուսական ծառայությունը։

Առանձին հայտարարությամբ Թրամփը նշել է արտասահմանյան արտադրության բոլոր բեռնատարների համար 25% մաքսատուրքի սահմանման մասին: Նա ասել է, որ այս միջոցառումը նախատեսված է ամերիկյան արտադրողներին, այդ թվում՝ Peterbilt-ին, Kenworth-ին, Freightliner-ին և Mack Trucks-ին աջակցելու համար: Ամերիկացի առաջնորդն իր որոշումը, ի թիվս այլ բաների, հիմնավորել է «ազգային անվտանգության» նկատառումներով:

Կահույքի համար նախատեսված են տարբեր մաքսատուրքեր. խոհանոցային, լոգարանների կահույքը և դրանց հետ կապված ապրանքները կենթարկվեն 50 տոկոս մաքսատուրքի, մինչդեռ փափուկ կահույքը՝ 30 տոկոս։

Վերջին ամիսներին Թրամփը կտրուկ խստացրել է մաքսատուրքերի քաղաքականությունը բազմաթիվ առևտրային գործընկերների հետ։ Ավելի բարձր մաքսատուրքերից խուսափելու և կանխատեսելիությունն ապահովելու համար Եվրամիությունը համաձայնել է 15 տոկոս ընդհանուր մաքսատուրքի, որը կիրառվում է ապրանքների մեծ մասի վրա օգոստոսի 7-ից։

Հինգշաբթի ԱՄՆ-ն հետաձգմամբ նվազեցրել է ԵՄ ավտոմեքենաների համար մաքսատուրքերը՝ օգոստոսի 1-ից հետադարձ ուժով սահմանելով դրանց նկատմամբ 15 տոկոս մաքսատուրք՝ նախկին 27,.5 տոկոսի փոխարեն։ Այնուամենայնիվ, այս մակարդակը մնում է ավելի բարձր, քան Թրամփի պաշտոնավարման նախորդող շրջանում։ ԱՄՆ-ը շարունակում է 50 տոկոս մաքսատուրք սահմանել պողպատի և ալյումինի համար։

Թարգմանությունը՝ Էմմա Չոբանյանի